Sadist lover: ప్రియురాలి తల్లితో తేడా, ఎంతకాలం బ్రహ్మచారిగా ఉండాలి ?, జనాబా లెక్కల్లో పేరు!

చెన్నై/ ఈరోడ్/ మదురై: ప్రేమించిన అమ్మాయిని ఇచ్చి పెళ్లి చెయ్యడానికి ప్రియురాలి తల్లి నిరాకరించింది. తాను ఇంకా బాగా చదువుకోవాలని, పెళ్లి గురించి తరువాత ఆలోచిద్దాం, ఫస్ట్ మా అమ్మ గ్రీన్ సిగ్నల్ ఇవ్వాలి కదా అంటూ ప్రియురాలు అడ్డం తిరిగింది. ఇంతకాలం చెట్టాపట్టాలు వేసుకుని తిరిగిన ప్రియురాలు ఆ మాట చెప్పేసరికి ప్రియుడు షాక్ కు గురైనాడు. సరే ప్రియురాలి తల్లిని లైన్ లో పెట్టి ఆమెతో ఓకే అనిపించుకుంటే తరువాత చూద్దాం అని ప్రియుడు అనుకున్నాడు. అయితే ప్రియురాలి తల్లితో తేడా రావడంతో విసిగిపోయిన ప్రియుడు పదునైన కొడవలి తీసుకుని కాబోయే అత్తను అడ్డంగా నరికేసి ఆపేరు జనాబా లెక్కల్లో నుంచి తీసేశాడు.

మేరీకి ఐదు మంది కూతుర్లు

తమిళనాడులోని ఈరోడ్ జిల్లా గోపీ పట్టణం సమీపంలోని మోడచూర్ లో తమిళస్టాన్, మేరీ (56) దంపతులు నివాసం ఉంటున్నారు. అనారోగ్యంతో తమిళస్టాన్ మరణించాడు. మేరీకి ఐదు మంది కుమార్తెలు ఉన్నారు. ఇద్దరు కుమార్తెలు పెళ్లి చేసుకుని వారి భర్తలతో కలిసి నివాసం ఉంటున్నారు. మిగిలిన ముగ్గురు కుమార్తెలు మేరీతో కలిసి నివాసం ఉంటున్నారు.

లారీ డ్రైవర్ వర్షిణి లవ్ ట్రాక్

బార్గూర్ కు చెందిన మురుగన్ (27) అనే యువకుడు లారీ డ్రైవర్ గా పని చేస్తున్నాడు. మేరీ కూడా ట్రాలీల వ్యాపారం చేస్తుండటంతో మురుగన్ కు ఆమెకు పరిచయం ఉంది. మేరీ కుమార్తె వర్షిణి, మురుగన్ ప్రేమించుకున్నారు. వర్షిణి ప్రస్తుతం చదువు కుంటోంది. మేరీ మరో ఇద్దరు కుమార్తెలు ప్రైవేట్ మిల్లులో ఉద్యోగాలు చేస్తున్నారు.

మొదట ఓకే.... తరువాత రివర్స్ గేర్

వర్షణిని ఇచ్చి మురుగన్ కు వివాహం చెయ్యడానికి మొదట మేరీ అంగీకరించిందని సమాచారం. కొంతకాలం తరువాత తాను ఇంకా బాగా చదువుకోవాలని, పెళ్లి గురించి తరువాత ఆలోచిద్దామని, ఇప్పటికైతే తాను పెళ్లి చేసుకోలేనని ప్రియురాలు వర్షిణి అడ్డం తిరిగింది. ఎలాగైనా వర్షిణితో తన పెళ్లి జరిపించాలని మురుగన్ ప్రియురాలు తల్లి మేరీని వేడుకున్నాడు. అయితే పెళ్లి గురించి తరువాత చూద్దాంలే అంటూ మేరీ కూడా నిర్లక్షం చేసింది.

ప్రియుడికి తట్టుకునే ఓపిక లేదు

తాను ఇంకా ఎంతకాలం బ్రహ్మచారిగా ఉండాలి, వెంటనే వర్షిణితో తన పెళ్లి చెయ్యాలని మురుగన్ కొంతకాలం నుంచి పట్టుబడుతున్నాడు. రాత్రి మేరీ, వర్షిణి ఇద్దరూ ఇంట్లో ఉన్నారని తెలుసుకున్న మురుగన్ బైక్ లో వారి ఇంటి దగ్గరకు వెళ్లాడు. ఇక వేచిచూసే ఓపిక నాకులేదు, మర్యాదగా వర్షిణితో నాకు పెళ్లి చెయ్యాలి, లేదంటే కథ వేరుగా ఉంటుంది అంటూ మురుగన్ మేరీ మీద రెచ్చిపోయాడు.

పోరా కుక్కా అంటే నరికేశాడు

రాత్రి మేరీ ఇంటిలో మురుగన్ పెద్ద గొడవ చేశాడు. ఆ సమయంలో మర్యాదగా ఇక్కడి నుంచి వెళ్లిపోరా కుక్కా అంటూ మేరీ నోటికి వచ్చినట్లు మురుగన్ ను దూషించిందని తెలిసింది. ఆ సమయంలో ముందుగానే బైక్ లో పదునైన కొడవలి పెట్టుకుని వెళ్లిన మురుగన్ ఒక్కసారిగా సహనం కోల్పోయాడు. వెంటనే కొడవలి తీసుకుని వెళ్లి మేరీని ఇష్టం వచ్చినట్లు నరికేశాడు.

వీరంగం చేసిన మురుగన్ ఎస్కేప్

మేరీ మీద కొడవలితో దాడి చెయ్యడంతో ఆమె కుమార్తెలు కేకలు వేశారు. స్థానికులు మురుగన్ ను అడ్డుకోవడానికి ప్రయత్నించారు. ఆ సమయంలో ఇంకా రెచ్చిపోయిన మురుగన్ కొడవలితో వీరంగం చెయ్యడంతో స్థానికంగా నివాసం ఉంటున్న గణేష్, రవి అనే వ్యక్తికి గాయాలైనాయి. చిక్కిపోతామని భయపడిన మురుగన్ అతని బైక్ అక్కడే వదిలేసి అక్కడి నుంచి పారిపోయాడు. వెంటనే మేరీ, గణేష్, రవిని ఆసుపత్రికి తరలించారు. చికిత్స విఫలమై మేరీ ప్రాణాలు గాలిలో కలిసిపోయాయి.

అడవిలో కాలక్షేపం

మేరీ ప్రాణాలు పోయాయని తెలుసుకున్న మురుగన్ అంతియూర్ సమీపంలోని తట్టక్కరై అటవి ప్రాంతంలోకి వెళ్లి అక్కడ తలదాచుకున్నాడు. స్థానిక గ్రామస్తులు ఎవరో కొత్త వ్యక్తి వచ్చి ఇక్కడ దాక్కున్నాడని గుర్తించి అంతియూర్ పోలీసులకు సమాచారం ఇచ్చారు. అంతియూర్ పోలీసులు మురుగన్ ను పట్టుకుని విచారణ చెయ్యగా తాను మేరీ అనే మహిళను హత్య చేసి ఇక్కడికి వచ్చి దాక్కున్నాని మురుగన్ అంగీకరించాడు. కొబే పోలీసులకు మురుగన్ ను అప్పగించారు. కుమార్తె పెళ్లి విషయంలో ప్రియుడి చేతిలో తల్లి మేరీ హత్యకు గురి కావడం కొబే ప్రాంతంలో కలకం రేపింది.