ఫేస్బుక్ నుంచి పేర్లు, ఫోటోలు.. పోర్న్ వెబ్సైట్లపై హైకోర్టు సీరియస్..!
హైదరాబాద్ : పోర్న్ వెబ్సైట్లపై హైకోర్టు సీరియస్ అయింది. ఆ క్రమంలో గూగుల్ సంస్థకు నోటీసులు జారీ చేసింది. పోర్న్ వెబ్సైట్లకు సంబంధించి పూర్తి వివరాలు న్యాయస్థానంలో సమర్పించాలని ఆదేశించింది. పోర్న్ వెబ్సైట్లపై చర్యలు తీసుకోవాలన్న పిటిషన్పై మంగళవారం నాడు హైకోర్టు విచారణ చేపట్టింది. ఆ క్రమంలో అశ్లీల పోర్న్ వెబ్సైట్లు విచ్చలవిడిగా ప్రవర్తిస్తున్నాయని హైకోర్టు ఆగ్రహం వ్యక్తం చేసింది.
సోషల్ మీడియా వేదికైన ఫేస్బుక్ నుంచి కొందరి పేర్లు, ఫోటోలు సేకరించి వాటిని పోర్న్ పోర్న్ వెబ్సైట్లలో పెడుతున్నారని ఆరోపిస్తూ ఓ యువతి హైకోర్టులో పిటిషన్ దాఖలు చేశారు. సదరు పిటిషన్పై మంగళవారం నాడు విచారణ చేపట్టిన న్యాయస్థానం ఆ యువతి చెప్పిన పలు అంశాలను పరిగణనలోకి తీసుకుంది.
సీఎం కేసీఆర్ ఇలాకాలో మరో షాక్.. మల్లన్న సాగర్ కేసులో హైకోర్టు ఝలక్.. మరో ఇద్దరికి జైలు శిక్ష!
ఆ క్రమంలో తన పేరుతో పాటు తనకు సంబంధించిన ఫోటోలు పోర్న్ సైట్లలో దర్శనమివ్వడం ఆశ్చర్యానికి గురిచేసిందని ఆ యువతి హైకోర్టు దృష్టికి తీసుకొచ్చారు. ఆ విషయం గూగుల్ సంస్థకు గతంలో ఫిర్యాదు చేసినట్లు న్యాయస్థానానికి వివరించారు. తన పేరు, ఫోటోలను డిలేట్ చేయాల్సిందిగా కోరినప్పటికీ ఎలాంటి స్పందన లేదని చెప్పుకొచ్చారు.
గూగుల్ సంస్థ రెస్పాండ్ కాకపోయేసరికి హైకోర్టు మెట్లెక్కారు ఆ యువతి. ఆమె పిటిషన్పై విచారించిన హైకోర్టు పోర్న్ వెబ్సైట్లపై సీరియస్ అయింది.పోర్న్ వెబ్సైట్లు రూపొందిస్తున్నవారి పట్ల గూగుల్ సంస్థ ఎందుకు నిర్లక్ష్యంగా వ్యవహరిస్తోందని ప్రశ్నించింది. అలాంటి వెబ్సైట్లపై ఎందుకు చర్యలు తీసుకోవడం లేదని ఆగ్రహం వ్యక్తం చేసింది. ఆ క్రమంలో అశ్లీల వెబ్సైట్లకు అడ్డుకట్ట వేయాల్సిందిగా గూగుల్ సంస్థకు నోటీసులు జారీ చేసింది. తదుపరి విచారణను వచ్చే నెల ఒకటో తేదీకి వాయిదా వేస్తూ పోర్న్ వెబ్సైట్లకు సంబంధించి పూర్తి వివరాలు ఇవ్వాలని ఆదేశించింది.