తప్పతాగి బార్ గర్ల్స్ తో పోలీసుల చిందులు.. దెబ్బకు సస్పెండ్
పాట్నా : బీహార్ లోని భోజ్ పూర్ లో జరిగిన ఓ ప్రైవేట్ ఫంక్షన్ లో స్థానిక పోలీసులు ముగ్గురు పీకలదాకా తాగి బార్ గర్ల్స్ తో ఒళ్లు తెలియకుండా చిందులేశారు. ఈ వీడియో కాస్త బుధవారం నాడు ఇంటర్నెట్ లో ప్రత్యక్షం కావడంతో విషయాన్ని సీరియస్ గా పరిగణించిన పాట్నా జోనల్ ఐజీ నయ్యర్ హుసేన్ ఖాన్ ఆ ముగ్గురిని సస్పెండ్ చేస్తున్నట్లు ప్రకటించారు.
సస్పెండ్ అయిన ముగ్గురిలో ఓ ఎస్.హెచ్ఓ (స్టేషన్ హౌజ్ ఆఫీసర్) శంకర్ తో పాటు ఏఎస్సై దేవచంద్ర సింగ్, కానిస్టేబుల్ భూషణ్ ఉన్నారు. వీరంతా భోజ్ పూర్ జిల్లాలోని కోయిల్వార్ పోలీస్ స్టేషన్ లో విధులు నిర్వర్తిస్తున్నారు. కాగా, ముగ్గురు కలిసి ఓ ప్రైవేటు ఫంక్షన్ కు హాజరైన సందర్బంలో అక్కడ బార్ గర్ల్స్ తో డ్యాన్సులు చేయడం.. అది కాస్త ఇంటర్నెట్ లోకి ఎక్కడంతో.. విషయం వివాదస్పదంగా మారింది.
వీడియో ఫుటేజీని పరిశీలించిన అనంతరం ముగ్గురిపై చర్యలు తీసుకున్నారు ఐజీ. ఇదిలా ఉంటే విజయదశమి సందర్బంగా కోయిల్వార్ లోని స్థానిక పూజ కమిటీ ఆధ్వర్యంలోనే ఈ ప్రైవేట్ ఫంక్షన్ జరిగినట్లుగా తెలుస్తోంది.