20ఏళ్లు చిన్నవాడైన యోగి ఆదిత్యనాథ్ కాళ్లు మొక్కిన సీఎం రమణ్ సింగ్(వీడియో)

రాయ్‌పూర్‌: ఛత్తీస్‌గఢ్ అసెంబ్లీ ఎన్నికలు జరగనున్న నేపథ్యంలో ఆసక్తికర ఘటన చోటు చేసుకుంది. ఛత్తీస్‌గఢ్ రాష్ట్ర ముఖ్యమంత్రి రమణ్‌ సింగ్‌ (66).. రాజ్‌నందగావ్ నియోజక వర్గం నుంచి పోటీ చేయడానికి మంగళవారం నామినేషన్ దాఖలు చేశారు. ఇందుకోసం ఆయన తన భార్య వీణా సింగ్‌తో పాటు ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌, బీజేపీ ఛత్తీస్‌గఢ్‌ ఇన్‌ఛార్జీ అనిల్‌ జైన్, ఇతర పార్టీ నేతలతో కలిసి కలెక్టరేట్‌ వద్దకు వెళ్లారు.

This is the amount of Respect Mahant @myogiadityanath has among even in political circle.#RamanSingh touches the feet of Yogi ji twice before his nomination. pic.twitter.com/m47GqH6Ii3

— Sumit Mishra (@_SumitMishra) October 23, 2018

యోగి పాదాలను తాకిన సీఎం రమణ్ సింగ్

కాగా, నామినేషన్‌ దాఖలు చేసిన అనంతరం సీఎం రమణ్ సింగ్.. తన కంటే 20 ఏళ్లు చిన్నవాడైన యోగి ఆదిత్యనాథ్ (46) కాళ్లను మొక్కారు. అయితే రాజకీయ రంగంలోనూ ఆయన కన్నా రమణ్‌ సింగ్‌ చాలా సీనియర్‌. 2003 నుంచి ఆయన ఛత్తీస్‌గఢ్‌ ముఖ్యమంత్రిగా ఉంటోన్న విషయం తెలిసిందే.

యోగి పుట్టకముందే బీజేపీలో రమణ్ సింగ్..

రమణ్ సింగ్ విద్యార్థిగా ఉన్న సమయంలోనే 1970లో భారతీయ జన సంఘ్‌లో చేరారు. అనంతరం 1976-77 కాలంలో ఆ పార్టీ యువ విభాగ అధ్యక్షుడయ్యారు. కాగా, యోగి ఆదిత్యనాథ్‌ 1972లో జన్మించారు. ‌ ‌కాగా, రాజ్‌నందగావ్ నుంచి రమణ్‌ సింగ్‌ ఇప్పటికి రెండుసార్లు పోటీ చేసి గెలిచారు.

రమణ్ సింగ్‌పై వాజపేయి మేనకోడలు పోటీ..

ముచ్చటగా మూడోసారి విజయం సాధించాలనుకుంటున్నారు. రాజ్‌నందగావ్ నియోజక వర్గం నుంచి కాంగ్రెస్‌ తమ అభ్యర్థిగా భారత మాజీ ప్రధాని వాజ్‌పేయీ మేనకోడలు కరుణా శుక్లాను పోటీకి దింపనుంది.

నాలుగోసారి బీజేపీదే అధికారం

మంగళవారం నామినేషన్‌ వేసిన అనంతరం రమణ్‌ సింగ్‌ మాట్లాడుతూ... బూత్‌ స్థాయి నుంచి పార్టీ బలంగా ఉందని అన్నారు. ఈ ఎన్నికల్లోనూ గెలిచి బీజేపీని రాష్ట్రంలో నాలుగోసారి భారీ మెజార్టీతో అధికారంలోకి తీసుకురావడానికి ప్రతి కార్యకర్త కృషి చేస్తున్నారని చెప్పారు.

యోగి ప్రచారం

ఛత్తీస్‌గఢ్ అసెంబ్లీ ఎన్నికల నేపథ్యంలో యోగి ఆదిత్యనాథ్ పలు బహిరంగసభల్లో పాల్గొని ప్రసంగించారు. రమణ్ సింగ్ ప్రభుత్వాన్ని మరోసారి గెలిపించాలంటూ పిలుపునిచ్చారు. కాగా, ఛత్తీస్‌గఢ్ రాష్ట్రంలో నవంబరు 12న జరగనున్న మొదటి దశ ఎన్నికలకుగానూ నామినేషన్లు దాఖలు చేయడానికి ఈ రోజే చివరిరోజు. ఆ రాష్ట్రంలో మొత్తం 90 అసెంబ్లీ సీట్లు ఉన్నాయి. రెండో దశ ఎన్నికలు నవంబరు 20న జరుగుతాయి. ఫలితాలు డిసెంబరు 11న వెల్లడవుతాయి.

English summary

Chhattisgarh CM Raman Singh today filed his nomination for the upcoming assembly elections in the state. The veteran BJP leader filed his nomination from Rajnandgaon constituency. He submitted his nomination papers to the collector and district magistrate Bhim Singh in the presence of Uttar Pradesh Chief Minister Yogi Adityanath and other officials.