మద్యం మత్తులో రష్యా దౌత్యవేత్త వీరంగం (వీడియో)
న్యూఢిల్లీ: పీకలదాక మద్యం సేవించిన రష్యా దౌత్యవేత్త మద్యం మత్తులో వీరంగం సృష్టించిన సంఘటన దేశ రాజధాని ఢిల్లీలో జరిగింది. అర్ధరాత్రి అతను చేసిన రాద్దాంతంతో బైక్ లో వెళుతున్న ఇద్దరికి తీవ్రగాయాలైనాయి.
ఢిల్లీ పోలీసు మీద ఆ రష్యా దౌత్యవేత్త చెయ్యి చేసుకున్నాడని పోలీసులు కేసు నమోదు చేసి ఎఫ్ఐఆర్ తయారు చేశారు. పోలీసు అధికారుల కథనం మేరకు..... బుధవారం వేకువ జామున 1.30 గంటల సమయంలో రష్యా దౌత్యవేత్త మద్యం సేవించి కారు నడుపుతూ బయలుదేరాడు.
మార్గం మద్యలో మోతీబాగ్ ప్రాంతంలో ముందు వెళుతున్న ఓ బైక్ ను వేగంగా కారుతో డీకొన్నాడు. బైక్పై వెళుతున్న వారు కిందపడి గాయాలైనాయి. విషయం గుర్తించిన గస్తీ పోలీసులు కారు నిలపాలని సూచించారు.
అయితే రష్యా దౌత్యవేత్త కారును వేగంగా నడుపుకుంటూ వెళ్లి పోలీసులు ఏర్పాటు చేసిన బ్యారికేడ్లను డీకొనడంతో అతనికి గాయాలైనాయి. అక్కడికి వెళ్లి ప్రశ్నించిన పోలీసు మీద రష్యా దౌత్యవేత్త చెయ్యి చేసుకున్నాడు.
విషయం తెలుసుకున్న పోలీసు అధికారులు సంఘటనా స్థలానికి చేరుకున్నారు. రష్యా దౌత్తవేత్త స్నేహితుడు పోలీసు అధికారులతో మాట్లాడి అయన్ను రష్యా దౌత్య కార్యాలాయానికి తీసుకు వెళ్లాడు.
రష్యా రాయబార కార్యాలయానికి సమాచారం ఇచ్చామని, దౌత్యవేత్త మీద కేసు నమోదు చేసి దర్యాప్తు చేస్తున్నామని పోలీసు అధికారులు తెలిపారు. మద్యం మత్తులో దౌత్యవేత్త ఇష్టం వచ్చినట్లు ప్రవర్తించాడని, గాయాలైన ఇద్దరూ ఆసుపత్రిలో చికిత్స పొందుతున్నారని పోలీసులు చెప్పారు.