ప్రచారం చేస్తా: బిజెపిలోకి తమిళ నటుడు విజయ్
చెన్నై : సీనియర్ తమిళ నటుడు విజయ్ కుమార్ భారతీయ జనతా పార్టీలో చేరారు. తమిళనాడు రాజధాని చెన్నైలో కేంద్ర మంత్రి రాధాకృష్ణన్ సమక్షంలో బుధవారం ఆయన కమలం కండువా కప్పుకొన్నారు.
ఈ విషయమై రాధాకృష్ణన్ మాట్లాడుతూ.. భాజపా సాదరంగా విజయ్ కుమార్ని ఆహ్వానిస్తోందని చెప్పారు. తమిళ సినీ నటులు బిజెపిలోకి రావడం విజయ్ కుమార్తోనే ప్రారంభమవుతోందని ఆయన అన్నారు. బిజెపిలో చేరేందుకు పలువురు సినీ నటులు సిద్ధంగా ఉన్నారని తెలిపారు.
ఈ సందర్భంగా విజయ్ కుమార్ మీడియాతో మాట్లాడుతూ.. రానున్న అసెంబ్లీ ఎన్నికల్లో అధిష్ఠానం ఆదేశాల మేరకు తాను బిజెపి తరఫున ప్రచార కార్యక్రమాల్లో పాల్గొంటానని చెప్పారు. ప్రధాని నరేంద్ర మోడీ ఎన్నో అభివృద్ధి, సంక్షేమ పథకాలను అమలు చేస్తున్నారని ప్రశంసించారు.
ఎన్నికల్లో పోటీ చేయాలనే ఉద్దేశంతో తాను రాజకీయాల్లోకి రాలేదని, తమిళనాడులో బిజెపి ప్రభుత్వం రావాలనే ఆకాంక్షతోనే పార్టీలో చేరినట్లు చెప్పారు. కాగా, విజయ్ కుమార్కి దక్షిణాది సినీ పరిశ్రమలో మంచి పేరుంది. ఆయన సుమారు 800లకు పైగా సినిమాల్లో నటించారు.