‘వీడొక్కడే’ తరహాలో డ్రగ్స్ స్మగ్లింగ్.. కడుపులో హెరాయిన్ క్యాప్సూల్స్ పగిలి..
హీరో సూర్య సినిమా ‘వీడొక్కడే’లో మాదిరిగా రూ.8 కోట్ల విలువైన 61 హెరాయిన్ క్యాప్సూల్స్ నోటి ద్వారా మింగి తన కడుపులో భద్రపరచుకుని స్మగ్లింగ్ చేసేందుకు యత్నించాడో అఫ్ఘన్ యువకుడు. కానీ కథ అడ్డంతిరిగింది..
న్యూఢిల్లీ: తెలుగు, తమిళంలో సూపర్ హిట్టైన హీరో సూర్య సినిమా 'వీడొక్కడే' గుర్తుందా? డ్రగ్స్, డైమండ్స్ అక్రమ రవాణా దందాపై రూపొందించిన ఆ సినిమాలో.. కస్టమ్స్ అధికారులకు దొరకకుండా కొకెయిన్ ప్యాకెట్లు మనుషుల కడుపులో పెట్టి సరఫరా చేస్తుంటారు. ఆలా పొట్టలోనే డ్రగ్స్ ప్యాకెట్లు పగిలిపోవడంతో హీరో ఫ్రెండ్ చిట్టీ చనిపోతాడు కూడా.
సరిగ్గా ఇలాంటి సన్నివేశమే ఢిల్లీ ఎయిర్పోర్టులో చోటుచేసుకుంది. అఫ్ఘనిస్తాన్ నుంచి ఢిల్లీకి వచ్చిన ఓ యువకుడు విమానాశ్రయంలో కళ్లు తిరిగి పడిపోవడంతో హుటాహుటిన ఆస్పత్రికి తరలించారు.
అతడిని స్కాన్ చేయగా, అతడి కడుపులో సుమారు రూ.8 కోట్ల విలువైన 61 హెరాయిన్ ప్యాకెట్లు కనిపించాయి. వెంటనే ఆపరేషన్ చేసి వాటిని బయటికి తీసినప్పటికీ, ఆ యువకుడి ప్రాణాలు దక్కలేదు. చనిపోయిన యువకుడిని అఫ్ఘన్ జాతీయుడైన హమీద్ మొహమ్మద్(19)గా గుర్తించినట్లు నార్కోటిక్స్ అధికారులు తెలిపారు.
సఫ్దార్ గంజ్ ఆస్పత్రిలో నిర్వహించిన ఆపరేషన్ అతడి కడుపులోంచి 61 క్యాప్సుల్స్ వెలికి తీశామని, ఒక్కోటీ రెండు నుంచి మూడు సెంటీమీటర్ల పొడవైన ప్లాస్టిక్ సంచుల్లో హెరాయిన్ నిండుగా నింపారని అధికారులు వివరించారు.
అయితే కడుపులోని క్యాప్సుల్స్లో ఒకట్రెండు పగిలిపోవడంతో హమీద్ అపస్మారక స్థితిలోకి వెళ్లిపోయాడని, వైద్యులు అతడి ప్రాణాలు నిలిపేందుకు చివరిదాకా ప్రయత్నించినా ఫలితం దక్కలేదని పేర్కొన్నారు.
మృతుడి శరీరంపై ఆపరేషన్ చేసిన ఆనవాళ్లేవీ కానరాకపోవడంతో.. డ్రగ్స్ సంచుల్ని అతడు నోటి ద్వారానే మింగినట్లు భావిస్తున్నామని వైద్యులు చెప్పారు. ఢిల్లీ ఎయిర్ పోర్టులో ఇలాంటి ఘటనలు గతంలోనూ చోటు చేసుకున్నాయి.