అమెజాన్ను నిషేధించండి: టాయ్లెట్ కవర్లపై హిందూ దేవతల ఫోటోలు..నెటిజెన్ల ఆగ్రహం
ముంబై: ప్రముఖ ఈకామర్స్ సంస్థ అమెజాన్ మరోసారి వివాదాల్లో కూరుకుపోయింది. హిందూ దేవుళ్ల ఫోటోలు ఉన్న టాయ్లెట్ కవర్లను తమ వెబ్సైట్పై అమ్మకానికి పెట్టారు. ఇది అమెరికాలోని అమెజాన్ వెబ్సైట్పై కనిపించింది. దీంతో ఒక్కసారిగా సోషల్ మీడియాలో నెటిజెన్లు ఆగ్రహం వ్యక్తం చేశారు. అమెజాన్ను నిషేధించాలంటూ ట్వీట్ చేశారు. చాలామంది ఈ-కామర్స్ వెబ్ సైట్ అమెజాన్ను నిషేధించాలని చెబుతూ అదే సమయంలో విదేశీ వ్యవహారాల శాఖ మంత్రి సుష్మా స్వరాజ్ను అమెజాన్ సంస్థపై చర్యలు తీసుకోవాలని డిమాండ్ చేశారు. అయితే అమెజాన్ సంస్థ దీనిపై ఎలాంటి వ్యాఖ్యలు చేయలేదు.
2017లో కూడా భారత జెండా కలిగిన డోర్ మ్యాట్లను కెనడాకు చెందిన అమెజాన్ వెబ్సైట్ అమ్మకానికి ఉంచడంతో సుష్మా స్వరాజ్ సీరియస్ అయ్యారు. దీంతో భారత్లో పనిచేస్తున్న అమెజాన్ ఉద్యోగుల వీసాలను రద్దు చేస్తామని హెచ్చరించారు. దీంతో దిగొచ్చిన అమెజాన్ సంస్థ క్షమాపణ చెప్పింది.
ఇంకా ఇది మరువక ముందే మళ్లీ హిందువుల దేవతల ఫోటోలతో అమెజాన్ సంస్థలో టాయ్లెట్ కవర్లు, యోగా మ్యాట్లు, స్నీకర్స్, రగ్స్, ఇతర వస్తువులు దర్శనమిచ్చాయి. అయితే విషయం తెలిసిన వెంటనే ఆ వస్తువులను అమ్మకాల జాబితా నుంచి తొలగించింది. 2017లో కూడా అమెజాన్ సంస్థ ఇలానే చేసింది. హిందువు దేవుళ్ల ఫోటోలతో కూడిన వస్తువులను అమ్మకానికి పెట్టగానే పెద్ద ఎత్తున దుమారం రేగడంతో వెంటనే జాబితా నుంచి ఆ వస్తువులను తొలగించింది.