అన్నా హజారేని చంపేస్తాం, బెదిరింపు లేఖ
ముంబై: ప్రముఖ సామాజిక ఉద్యమకారుడు అన్నా హజారేని చంపేస్తామని గుర్తు తెలియన వ్యక్తులు బెదిరింపులకు పాల్పడ్డారు. ఢిల్లీ ముఖ్యమంత్రి, అప్ అధినేత అరవింద్ కేజ్రీవాల్ కు దూరంగా ఉండాలని అన్నా హజారేని హెచ్చరించారు.
అరవింద్ కేజ్రీవాల్ కు దూరంగా వెళ్లకుంటే నిన్ను హత్య చేస్తామని బెదిరింపు లేఖ పంపించారు. గుర్తు తెలియని వ్యక్తులు ఈ నెల 7వ తేదిన పూర్తి ఆంగ్లంలో లేఖ వ్రాశారని పోలీసు అధికారులు పీటీఐ వార్త సంస్థకు తెలిపారు.
బ్లాక్ మ్యాజిక్ (చేతబడి)కి వ్యతిరేకంగా పోరాటం చేసిన ప్రముఖ సామాజిక ఉద్యమకారుడు నరేంద్ర దబోల్కర్ కు పట్టిన గతే నీకు పడుతుందని అన్నా హజారేని హెచ్చరించారని పోలీసు అధికారులు వివరించారు. అంతే కాకుండా నిందితులు లేఖలో కొన్ని షరతులు విధించారు.
మహారాష్ట్రలోని నీ సోంత గ్రామం అయిన రాలే గాం సిద్ధి లో నుండి కాలు బయట పెట్టరాదని అన్నా హజారేని బెదిరించారు. ఈ లేఖ అందుకున్న పోలీసులు నేరపూరిత కుట్రకు పాల్పడ్డారని కేసు నమోదు చేశారు. లేఖ వ్రాసిన నిందితుల కోసం మహారాష్ట్ర పోలీసులు గాలిస్తున్నారు.