మానసిక వికలాంగురాలైన యువతిపై సైనికాధికారి రేప్: అరెస్ట్
నాసిక్: 21ఏళ్ల యువతిపై అత్యాచారానికి పాల్పడిన నేరం కింద ఆర్టిలరీ సెంటర్లో సీనియర్ సైనికాధికారిగా విధులు నిర్వహిస్తున్న వ్యక్తిని పోలీసులు అరెస్ట్ చేశారు. డియోలాలి క్యాంపులోని అతని నివాసంలోనే ఆ అధికారి ఆమెపై అఘాయిత్యానికి పాల్పడ్డాడు.
బాధితురాలి ఫిర్యాదు మేరకు కేసు నమోదు చేసుకున్న పోలీసులు, నిందితుడు కాల్నల్ వినోద్ సహానీని శనివారం రాత్రి అరెస్ట్ చేశారు. ఈ మేరకు వివరాలను ఏసిపి(డివిజన్1) అతుల్ జెండే తెలిపారు.
డియోలాలి క్యాంపు ప్రాంతంలోనే నిందితుడు అతని కుటుంబసభ్యులతోపాటు నివాసం ఉంటున్నారు. ఏప్రిల్ 30న తన ఇంట్లో ఎవరూ లేని సమయంలో ఆ యువతిని బలవంతంగా తీసుకెళ్లిన వినోద్ సహానీ ఆమెపై అత్యాచారానికి పాల్పడ్డాడని డియోలాలి క్యాంపు పోలీస్ స్టేషన్ సీనియర్ అధికారి రాజేష్ అఖడే తెలిపారు.
బాధితురాలు మానసిక వికలాంగురాలని పోలీసులు చెప్పారు. కాగా, తనను కావాలని ఈ కేసులో ఇరికించారని విచారణ సమయంలో సహానీ ఆరోపించారు.