ఆశారాం బాపు నా భర్త: కోర్టు వద్ద మహిళ అరుపులు
జోధ్పూర్: నకిలీ బాబా ఆశారాం బాపు విషయంలో వింత సంఘటన చోటు చేసుకుంది. లైంగిక దాడి కేసులో అరెస్టయిన ఆశారాం బాపును సోమవారం కోర్టుకు తీసుకుని వచ్చినప్పుడు ఈ సంఘటన చోటు చేసుకుంది. ఆశారాం తన భర్త అంటూ ఓ మహిళ కోర్టు వద్ద కేకలు పెట్టింది.
ఓ మహిళ కోర్టు అవరణలోకి వచ్చి ఆశారాం తన భర్త అంటూ కేకలు వేయడం ప్రారంభించిందని, ఆశారాం రాజస్థాన్లోని నాగౌర్ జిల్లా లద్నూ ప్రాంతంలో తనను వివాహం చేసుకున్నాడని ఆమె అన్నట్లు చెబుతున్నారు.
ఆ మహిళను పోలీసులు బయటకు తీసుకుని వెళ్లారు. అయితే, ఆశారాం ఆమె మాటలను ఖండించారు. కాగా, ఆశారాంపై పెట్టిన అత్యాచారం కేసుపై విచారణను కోర్టు ఓ రోజుకు వాయిదా వేసింది. నిరుడు ఆగస్టు 15వ తేదీన జోధ్పూర్లోని తన ఆశ్రమంలో 15 ఏళ్ల అమ్మాయిపై అత్యాచారం చేసినట్లు కేసు నమోదైన విషయం తెలిసిందే.
ఆ కేసులో విచారణ సోమవారం ప్రారంభమైంది. ఎఫ్ఐఆర్ పెట్టడానికి సాక్ష్యంగా భావిస్తున్న వీడియో క్లిప్పును బయటపెట్టాలనే డిమాండ్ను బాధితురాలి తరఫు న్యాయవాది వ్యతిరేకించారు. వీడియో క్లిప్పును బయటపెడితే బాధితురాలు ఎవరనేది తెలుస్తుందని ఆయన అన్నారు.