India
  • search
  • Live TV
వేగవంతమైన అలర్ట్స్ కోసం
వెంటనే సబ్‌స్క్రైబ్ చేసుకోండి  
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts
Oneindia App Download

CPC- క్రిమినల్ ప్రొసీజర్, ఐడెంటిఫికేషన్ బిల్: ఏమిటీ బిల్లు, కొందరు ఎందుకు ఆందోళన వ్యక్తం చేస్తున్నారు?

By Bbc Telugu
|
Google Oneindia TeluguNews
కొత్త చట్టం ప్రకారం పోలీసులు నిందితుల బయోమెట్రిక్ శాంపిల్స్ ను సేకరించవచ్చు

వ్యక్తుల బయోమెట్రిక్ డేటాను సేకరించడానికి భద్రతా ఏజెన్సీలకు విస్తృత అధికారాలను ఇచ్చే కొత్త చట్టంపై అనుమానాలు, ఆందోళనలు వ్యక్తమవుతున్నాయి. ఈ చట్టంతో ప్రజల ప్రైవసీకి భంగం కలుగుతుందని దీన్ని వ్యతిరేకించే వారు చెబుతున్నారు.

గతవారం పార్లమెంటులో ఆమోదం పొందిన క్రిమినల్ ప్రొసీజర్ (ఐడెంటిఫికేషన్) బిల్ ప్రకారం, అరెస్టయిన, నిర్బంధంలో ఉన్నవారు తమ ఐరిస్, రెటీనా స్కాన్‌‌ల వంటి సున్నితమైన డేటాను భద్రతా ఏజెన్సీలకు ఇవ్వడం తప్పనిసరి. పోలీసులు ఈ డేటాను 75 సంవత్సరాల వరకు తమ వద్ద ఉంచుకోవచ్చు.

ప్రభుత్వం ప్రవేశపెట్టిన ఈ బిల్లు రాష్ట్రపతి ఆమోదం పొందాల్సి ఉంది.

విపక్ష నేతలు ఈ చట్టంపై నిరసన వ్యక్తం చేస్తూ, ఇది క్రూరమైన, చట్టవిరుద్ధమైన చర్య అని విమర్శించారు.

అయితే, పోలీస్ వ్యవస్థను ఈ చట్టం ఆధునీకరిస్తుందని, నేరాలను వేగంగా గుర్తించి పరిష్కరించడానికి ఉపయోగపడుతుందని, నేర నిరూపణ రేట్‌ను పెంచుతుందని అధికార బీజేపీ ప్రభుత్వం అంటోంది.

ఈ చట్టంలోని ప్రధానమైన అంశం వ్యక్తిగత డేటా ప్రభుత్వం చేతిలోకి వెళ్లడం. ఇండియాలో డేటా ప్రొటెక్షన్‌కు సంబంధించిన చట్టాలు లేవు. కాబట్టి, ప్రభుత్వం చేతికి డేటాను ఇవ్వడమంటే, ప్రజలపై నిఘాకు ఆయుధం అందించడమేనని విమర్శకులు అంటున్నారు.

తనను వ్యతిరేకించే వారి సమాచారాన్ని ప్రభుత్వం సులభంగా పొందవచ్చు.

''డేటాను విస్తృతంగా సేకరించడం మరింత ప్రమాదకరం. ఈ బిల్లులో డేటాకు సంబంధించిన భద్రతపై ఎలాంటి నిబంధనలు లేవు. కాబట్టి దుర్వినియోగానికి అవకాశాలు ఎక్కువగా ఉన్నాయి. ఈ దుర్వినియోగం తీవ్రత కూడా ఎక్కువగా ఉండే అవకాశం ఉంది'' అని టెక్నాలజీ, పాలసీ విశ్లేషకుడు ఆదిత్య శర్మ అన్నారు.

ప్రైవసీ రక్షణ విషయంలో భారత రాజ్యాంగానికి, 2017 నాటి సుప్రీం కోర్టు తీర్పుకు విరుద్ధంగా ఈ బిల్లు ఉందని దీని విమర్శకులు అభిప్రాయపడుతున్నారు. వ్యక్తిగత గౌరవానికి ప్రైవసీ ఎంతో కీలకమని సుప్రీంకోర్టు తన 547 పేజీల తీర్పులో పేర్కొంది. వ్యక్తులపై నిఘా అనేది అత్యంత సహేతుకంగా ఉండాలని సూచించింది.

వ్యక్తులపై నిఘా పెట్టడం చట్ట విరుద్ధమని నిపుణులు అంటున్నారు

ఎందుకు వివాదం?

ప్రస్తుతం అమలులో ఉన్న ఐడెంటిఫికేషన్ ఆఫ్ ప్రిజనర్స్ యాక్ట్ -1920 ప్రకారం పోలీసులు నిందితుల ఫొటోలు, వేలిముద్రలు, కాలిముద్రలు మాత్రమే సేకరించగలరు. అది కూడా దోషులుగా నిర్ధారణ అయినవారు, బెయిల్ మీద బైటికి వచ్చేవారు లేదా ఏడాదిపాటు కఠిన కారాగార శిక్షను ఎదుర్కొంటున్న వారికి మాత్రమే వర్తిస్తుంది.

అయితే, కొత్త చట్టానికి విస్తృతమైన అధికారాలున్నాయి. దీని ప్రకారం వేలిముద్రలు, రెటీనా స్కాన్‌తోపాటు సంతకాలు, చేతిరాతలు, వీటికి తోడు బయోలాజికల్ శాంపిల్స్‌ను కూడా సేకరించవచ్చు. అయితే, బయోలాజికల్ శాంపిల్స్ అంటే ఏంటి అన్నదానికి స్పష్టమైన నిర్వచనం బిల్లులో లేదు.

దీని అర్థం డీఎన్ఏ, బ్లడ్ శాంపిల్స్ కూడా కావచ్చని కొందరు నిపుణులు అభిప్రాయపడుతున్నారు. ప్రస్తుతం ఇలాంటి శాంపిల్స్ తీసుకోవాలంటే పోలీసులు వారంట్ పొందాల్సి ఉంటుంది.

కొత్త చట్టం అమల్లోకి వస్తే ఎలాంటి వారంట్ లేకుండానే నిర్బంధంలో ఉన్న, అరెస్టయిన వ్యక్తుల నుంచి ఇలాంటి శాంపిల్స్ సేకరించవచ్చు. నిర్దోషిగా విడుదలైన లేదా విచారణ వరకు కూడా రాని వారి రికార్డులను తమ వద్ద ఉంచుకోవాలని న్యాయస్థానం లేదా మేజిస్ట్రేట్ పోలీసులను ఆదేశించవచ్చు.

''కోట్ల మంది భారతీయ నేరస్తుల ప్రొఫైల్స్‌ను తయారు చేసి వాటితో ఏం చేసుకుంటారు'' అని డిజిటల్ రైట్స్ రీసెర్చర్ శ్రీనివాస్ కొడాలి అన్నారు.

నేషనల్ క్రైమ్ రికార్డ్స్ బ్యూరో ఈ డేటాను 75 సంవత్సరాల పాటు తన దగ్గరే ఉంచుకోవచ్చని ఇందులోని నిబంధనలు చెబుతుండగా, దాని భద్రత ఎలా అన్నదానిపై బిల్లులో స్పష్టత లేదని నిపుణులు అంటున్నారు.

''దీని ఉద్దేశం పోలీసులు ఒక్కసారి వీరందరినీ తీసుకొచ్చి జైల్లో పెడతారని కాదు. మన పోలీసు వ్యవస్థకు అంత సామర్ధ్యం కూడా లేదు. కానీ, వ్యక్తులు ఏం చేస్తున్నారు అన్నదానిపై నిఘా పెట్టడానికి అవకాశం ఉంది'' అని శ్రీనివాస్ కొడాలి అన్నారు.

ఈ బిల్లు ఒక సాధారణ కానిస్టేబుల్‌కు కూడా వ్యక్తుల డేటాను సేకరించే అధికారాన్ని కట్టబెడుతుందని శ్రీనివాస్ వ్యాఖ్యానించారు.

అయితే, దేశంలో క్రైమ్ డేటాను సేకరించడం, తద్వారా నేరాలను కంట్రోల్ చేయడానికి ఇదొక అద్భుతమైన టూల్ అని ఉత్తర్‌ప్రదేశ్ పోలీస్ మాజీ చీఫ్ విక్రమ్ సింగ్ అన్నారు.

కాకపోతే, ఇందులో విచక్షణను ఉపయోగించాల్సిన అవసరం ఉందని ఆయన స్పష్టం చేశారు.

''శాంపిల్స్ సేకరించడానికి అధికారాలను పెంచారు. కానీ, దాని భద్రత, పర్యవేక్షణలను కూడా పెంచాలి'' అని ఆయన అన్నారు.

కొత్త చట్టం ద్వారా వ్యక్తుల వ్యక్తిగత సమాచారాన్ని పోలీసులు తీసుకోవచ్చు

ఇతర దేశాలలో ఇలాంటి చట్టాలు ఉన్నాయా?

వ్యక్తిగత సమాచారాన్ని సేకరించి పెట్టడం, అవసరమైనప్పుడు వాటిని తవ్వి తీసి ఉపయోగించుకోవడం చాలా సర్వసాధారణ విషయం. అమెరికా, యూకే సహా చాలా దేశాలలో బయోమెట్రిక్, ఫేషియల్ ఫీచర్స్, ఫింగర్ ప్రింట్స్, రెటీనా స్కాన్‌ల సేకరణ ఉంది.

అయితే, అరెస్టయిన, దోషిగా నిరూపణ అయిన వ్యక్తుల నుంచే వీటిని సేకరిస్తారు.

పోలీసులు అధికార దుర్వినియోగానికి పాల్పడినప్పుడు వారిని విచారించే వ్యవస్థలు ఇండియాలో లేవని శ్రీనివాస్ కొడాలి అన్నారు.

ప్రభుత్వాలు, భద్రతా సంస్థలు ఫేషియల్ రికగ్నిషన్ టెక్నాలజీని వినియోగించడం ప్రపంచవ్యాప్తంగా పెరుగుతోంది. ముఖ్యంగా నిరంకుశ ప్రభుత్వాలు ఉన్నచోట వ్యక్తులపై నిఘా పెట్టడానికి ఈ టెక్నాలజీని వినియోగిస్తున్నాయి.

హాంకాంగ్‌ నిరసనల సందర్భంగా చైనా ఇలాంటి నిఘా వ్యవస్థల ద్వారా ఉద్యమాన్ని అణచివేసే ప్రయత్నాలు చేసింది. దీని నుంచి తప్పించుకోవడానికి ఆందోళనకారులు ముఖాలకు మాస్కులు పెట్టుకోవడం, ఐడెంటిఫికేషన్‌ను అడిగే ప్రజారవాణా వ్యవస్థను వాడటం మానేశారు.

ఇలాంటి టెక్నాలజీ వల్ల ప్రయోజనం లేదని అనలేం. అమెరికాలో మిస్సయిన పిల్లలను, నేరస్తులను ఈ టెక్నాలజీ ద్వారా పోలీసులు గుర్తిస్తున్నారు. కాకపోతే, ఇందులోని అల్గారిథమ్స్‌లోని లోపాలు తప్పుడు సమాచారం ఇచ్చే ప్రమాదం కూడా ఉంది.

ఎదిరించిన వారిని అరెస్టు చేస్తున్నారని మోదీ ప్రభుత్వంపై విమర్శలు ఉన్నాయి

ఇండియాకు ఈ చట్టం అవసరం ఎంత?

2009లో ప్రారంభించిన వ్యవస్థ ద్వారా దేశంలోని వేలాది పోలీస్ స్టేషన్లకు క్రైమ్ రికార్డ్స్‌ను షేర్ చేసుకునే అవకాశం కల్పించారు. దీన్నిమించి వ్యక్తుల ప్రైవసీకి భంగం కలిగించడం అవసరమా అని నిపుణులు ప్రశ్నిస్తున్నారు.

ప్రైవసీకి భంగం అనే మాటకు మోదీ ప్రభుత్వ హయాంలో భిన్నమైన నిర్వచనాలు వినిపించాయి. ప్రభుత్వ వ్యతిరేకతను అణచివేయడానికి ప్రభుత్వం దీన్ని వాడుకుంటోందని చాలామంది వాదించారు.

ఇటీవలి సంవత్సరాలలో తనకు వ్యతిరేకంగా ఆందోళనలు చేసినవారిని, ఉద్యమకారులను ప్రభుత్వం పెద్ద ఎత్తున జైళ్లకు పంపిందని చెబుతున్నారు.

''నేరస్తులను పట్టుకోవడానికి టెక్నాలజీని వాడుకోవడం తప్పుకాదు. కానీ, ప్రజలను వేధించడానికి ఇలాంటి వాటిని ఎక్కువగా వినియోగిస్తుందన్న చెడ్డ పేరు ప్రభుత్వానికి ఉంది. నేరస్తులకన్నా ప్రత్యర్ధులను ఇబ్బంది పెట్టడానికి ఇలాంటివి వాడుతున్నారన్న అపవాదు ఉంది'' అని ఆదిత్య శర్మ అన్నారు.

ప్రభుత్వాలు ఎప్పటికప్పుడు కొత్త కొత్త సాంకేతికతలను తీసుకు వస్తూ నిఘా పెంచుతాయని కూడా నిపుణులు అంటున్నారు.

ఇజ్రాయెల్ నుంచి పెగాసస్ సాఫ్ట్‌వేర్‌ను మోదీ ప్రభుత్వం కొనుగోలు చేసిందని ప్రతిపక్షాలు విమర్శించగా, ప్రభుత్వం దాన్ని తోసిపుచ్చింది. 2019-20లలో పౌరసత్వ సవరణ చట్టానికి వ్యతిరేకంగా ఆందోళనల సందర్భంగా తాము ఫేషియల్ రికగ్నిషన్ సాఫ్ట్‌వేర్‌ను ఉపయోగించినట్లు ఉత్తర్‌ప్రదేశ్ పోలీసులు వెల్లడించారు.

ప్రభుత్వం ప్రజల డేటాను రక్షించడంలో విఫలమవుతోందన్న ఆరోపణలు తరచూ వినిపిస్తుంటాయి. ప్రపంచంలోనే అతి పెద్ద డేటా ఆధార్ నుంచి సమాచారం లీకయిందన్న ఆరోపణలు గతంలో పలుమార్లు వినిపించాయి.

''అరెస్టయినా, పోలీసుల అదుపులో ఉన్న వ్యక్తుల నుంచి పెద్ద మొత్తంలో డేటాను సేకరించడం మొదలుపెడితే ఇక దానికి అడ్డూ అదుపూ ఉండదు. ఉదాహరణకు ఒక పోలీసు ఆఫీసర్ శాంతియుతంగా నిరసన వ్యక్తం చేస్తున్న వ్యక్తి నుంచి డేటాను సేకరించి, భవిష్యత్తులో అతన్ని ఇబ్బంది పెట్టడానికి ఉపయోగించుకోవచ్చు'' అని ఆదిత్య శర్మ అభిప్రాయపడ్డారు.

''భారతదేశంలో డేటా ప్రొటెక్షన్‌కు సంబంధించిన సరైన మెకానిజం లేకపోవడం వల్లే దుర్వినియోగం జరుగుతోంది'' అని శర్మ అన్నారు.

2018లో ప్రవేశపెట్టిన డేటా ప్రొటెక్షన్ బిల్ ఇంకా పార్లమెంటు ఆమోదానికి నోచుకోలేదు. అయితే, ఈ బిల్లు వల్ల కూడా పౌరుల ప్రైవసీకి పూర్తి స్థాయి భద్రతకు హామీ ఇవ్వలేదని, సున్నితమైన డేటాను ప్రభుత్వం తీసుకోవడానికి అడ్డుగోడలు తక్కువని విమర్శలు అంటున్నారు.

''డేటా ప్రొటెక్షన్ బిల్ పార్లమెంటులో ఆమోదం పొందే వరకు ప్రజల డేటాను తీసుకోవడానికి ప్రభుత్వానికి ఎలాంటి అడ్డు ఉండదు'' అని శర్మ అభిప్రాయపడ్డారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)

English summary
CPC Criminal procedure Identification bill: What is this bill
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X