ఐదుగురు మహిళల్ని బట్టలు ఊడదీసి, నగ్నంగా ఊరేగించారు
లక్నో: ఉత్తర ప్రదేశ్ రాష్ట్రంలో మరో దారుణం వెలుగు చూసింది. ఐదుగురు దళత మహిళల దుస్తులు విప్పి బహిరంగంగా నిలబెట్టారు. ఈ సంఘటన షాజహాన్ పూర్ జిల్లా జలాలాబాద్లోని బడే హరెవా గ్రామంలో చోటు చేసుకుంది.
ఓ దళిత యువకుడితో అగ్రవర్ణ కులానికి చెందిన బాలిక వెళ్లిపోయింది. దీనికి ప్రతీకారంగా ఐదుగురు మహిళలను నగ్నంగా నిలబెట్టారు.
బాలిక కుటుంబానికి చెందిన వారు.. దళిత యువకుడి కుటుంబానికి చెందిన ఐదుగురు మహిళల చుట్టూ నిలబడ్డారు. యువకుడి కుటుంబంలో అతని తల్లి, అత్తా, చిన్నమ్మలు ఉన్నారు. బాలిక కుటుంబ సభ్యులు నడి రోడ్డు పైన వారి దుస్తులు విప్పారు.
అంతేకాదు, వారిని అలాగే గ్రామంలో తిప్పారు. కర్రలు తదితర వాటితో కొట్టుతూ ఊరంతా తిప్పారు. బాధిత కుటుంబం ఫిర్యాదు మేరకు... బాలిక కుటుంబ సభ్యులు వారిని శనివారం నాడు ఇంట్లో నుండి బయటకు లాక్కొచ్చారు. వారి దుస్తులను చించేశారు.
ఆ మహిళలు తిరగబడితే.. కొట్టారు. అలాగే, దుస్తులు లేకుండా కొట్టుకుంటూ ఊరంతా తిప్పారు. మార్కెట్ ప్రాంతంలో అరగంట పాటు అలాగే కూర్చుండబెట్టారు. అంతలో కొందరు వచ్చి బాలిక తల్లిదండ్రుల తీరును తప్పు పడుతూ వారిపై పోలీసులకు ఫిర్యాదు చేశారు.