ఈపీఎఫ్‌ వడ్డీ రేటు 8.5 శాతంగా ఖరారు - రెండు విడతలుగా ఖాతాల్లోకి - 6 కోట్ల మందికి ప్రయోజనం

ఎంప్లాయీస్ ప్రావిడెంట్ ఫండ్ ఆర్గనైజేషన్ లేదా ఉద్యోగుల భవిష్య నిధి సంస్థ (ఈపీఎఫ్ఓ) తన చందాదారులకు చెల్లంచే వడ్డీ రేటును ఖరారు చేసింది. కొవిడ్ పరిస్థితుల నేపథ్యంలో 2019-20 ఆర్థిక సంవత్సరానికి ఉద్యోగుల భవిష్య నిధి (ఈపీఎఫ్)పై 8.5 శాతం వడ్డీ చెల్లించాలని నిర్ణయించింది. బుధవారం జరిగిన ట్రస్టీల సమావేశంలో ఈ మేరకు నిర్ణయం తీసుకున్నట్లు తెలిపింది.

దీంతో దాదాపు 6 కోట్ల మంది ఉద్యోగులు, కార్మికులకు ప్రయోజనం చేకూరనుంది. అయితే..ఈఏడాది ఈపీఎఫ్ వడ్డీ చెల్లింపులను రెండు విడతలుగా ఖాతాల్లోకి వేస్తామని సంస్థ ప్రకటించింది. తొలివిడతగా 8.15 శాతం వడ్డీని వెంటనే చెల్లించి, మిగిలిన 0.35 శాతాన్ని డిసెంబర్ లో చెల్లిస్తామని చెప్పింది. 2019-20 ఆర్థిక సంవత్సరానికి ప్రకటించిన 8.5 శాతం వడ్డీ విషయంలో వెనుకడుగు వేయబోమని, కరోనా పరిస్థితుల వల్ల వడ్డీని రెండు వాయిదాల్లో చెల్లించాల్సి వస్తున్నదని ఈపీఎఫ్‌వో సెంట్రల్ బోర్డు ట్రస్టీ విర్జేష్ ఉపాధ్యాయ్ వ్యాఖ్యానించారు.

అంతేకాదు, నిధుల కొరతను అధిగమిచేందుకు స్టాక్ మార్కెట్ లో పెట్టుబడులు పెట్టాలన్న నిర్ణయాన్ని ఈపీఎఫ్‌వో ఎట్టకేలకు ఇవాళ ఉపసంహరించుకుంది. కోవిడ్-19 మహమ్మారి నేపథ్యంలో మార్కెట్లు స్థిరంగా లేనందువల్ల ఆ యోచనను విరమించుకున్నట్లు సంస్థ తెలిపింది. ఈపీఎఫ్‌వో అత్యున్నత స్థాయి వ్యవస్థ సెంట్రల్ బోర్డ్ ఆఫ్ ట్రస్టీస్ సమావేశం మరోసారి డిసెంబరులో జరుగనుంది.

2019-20 ఆర్థిక సంత్సరానికి ప్రకటించిన ఈపీఎఫ్ వడ్డీ రేటు గతేడాదితో పోల్చుకుంటే 15 బేసిక్ పాయింట్లు తక్కువ. 2018-19లో ఈపీఎఫ్ వడ్డీ రేటు 8.65 శాతం కాగా, 2017-18లో 8.55 శాతం, 2016-17లో 8.65 శాతం వడ్డీని ప్రకటించారు.

English summary

The Employees’ Provident Fund Organsation (EPFO) decided on Wednesday to credit interest rate to formal sector workers for 2019-20 in a staggered manner, citing the coronavirus pandemic’s impact on its income. The EPFO will credit 8.15 per cent to its subscribers for 2019-20 for now: significantly lower than 8.5 per cent it had decided upon in March.