ఫేస్బుక్లో ఎంగేజ్మెంట్ ఫొటోలు పెట్టి.. కటకటాల పాలయ్యాడు
కోజికోడ్: తన నిశ్చితార్థం ఫొటోలను తన ఫేస్బుక్ ఖాతాలో పోస్ట్ చేసి అరెస్టయ్యాడు ఓ ప్రబద్ధుడు. అదేలగంటే.. ఆ యువకుడు పోస్టు చేసిన నిశ్చితార్థం ఫొటోలను చూసిన అతని ప్రియురాలు.. తనను పెళ్లి చేసుకుంటానని మోసం మరో అమ్మాయిని వివాహం చేసుకుంటున్నాడని పోలీసులకు ఫిర్యాదు చేసింది. దీంతో సదరు యువకుడిపై కేసు నమోదు చేసిన పోలీసులు జైలుకు తరలించారు.
తనను వివాహం చేసుకుంటానని చెప్పి.. పలుమార్లు అత్యాచారానికి పాల్పడ్డాడని బాధిత యువతి పోలీసులకు ఇచ్చిన ఫిర్యాదులో పేర్కొంది. కూరచుండు ప్రాంతానికి చెందిన నిందితుడు ఎం షమీర్(29)ని బాధిత యువతి ఫిర్యాదు చేసిన రెండు రోజులకు అరెస్ట్ చేశారు.
తనను వివాహం చేసుకుంటానని చెప్పి మరో యువతితో వివాహానికి సిద్ధమవడంతో బాధిత యువతి ఆందోళనకు గురైందని పోలీసులు తెలిపారు. విషయం తెలుసుకున్న ఆ యువతి.. ప్రియుడి ఇంటికెళ్లి గొడవకు దిగిందని, పోలీసులు రావడంతో నిందితుడిపై ఫిర్యాదు చేసిందని చెప్పారు.
నిందితుడిపై అత్యాచార నేరం కింద కేసు నమోదు చేసినట్లు పోలీసులు తెలిపారు. నిందితుడు షమీర్ను కోర్టులో ప్రవేశపెట్టినట్లు తెలిపారు. నిందితుడికి 14 రోజుల జుడీషియల్ కస్టడీ విధించినట్లు పోలీసులు చెప్పారు.