'సెక్స్' కు ఒప్పుకోలేదని, ట్రాన్స్జెండర్పై 'కాల్పులు'..!
ఢిల్లీ : ఢిల్లీలో జరిగిన ఘటన వింత పోకడలకు అద్దంలా నిలుస్తోంది. విచక్షణ కోల్పోయిన ఇద్దరు యువకులు ట్రాన్స్జెండర్ అని చూడకుండా సెక్స్ కోసం ఆరాటపడ్డారు. మూడు రోజుల కిందట జరిగిన ఈ ఘటన ఆలస్యంగా వెలుగుచూసింది. 21 సంవత్సరాలున్న ఓ ట్రాన్స్జెండర్ ను ఆదివారం అర్ధరాత్రి దాటాక లిఫ్ట్ ఇస్తామంటూ ఇద్దరు యువకులు తమ కారులోకి ఎక్కించుకున్నారు. కొద్దిదూరం వెళ్లాక ఒకడు ట్రాన్స్జెండర్ ను వేధించాడు. సెక్స్ చేయాలంటూ పదేపదే మీదకొచ్చాడు. అయితే దీనికి ట్రాన్స్జెండర్ ఒప్పుకోకపోవడంతో క్షణికావేశానికి గురయ్యారు ఆ ఇద్దరు యువకులు.
సెక్స్ కోసం ఎంత ప్రయత్నించినా ఒప్పుకోలేదనే కోపంతో ట్రాన్స్జెండర్ పై కాల్పులు జరిపారు. అనంతరం కారులో నుంచి రోడ్డు మీదకు తోసేశారు. కొద్ది సమయం తర్వాత ఆ రోడ్డు మీదుగా వెళుతున్న కొందరు వ్యక్తులు రోడ్డుమీద పడి ఉన్న ట్రాన్స్జెండర్ ను చూసి హజ్రత్ నిజాముద్దీన్ పోలీసులకు సమాచారమిచ్చారు. ఘటనాస్థలికి చేరుకున్న పోలీసులు వెంటనే ఎయిమ్స్ ఆసుపత్రికి తరలించి వైద్యం అందించారు. ప్రాణపాయం తప్పిందని, ఆరోగ్యం నిలకడగానే ఉందంటున్నారు వైద్యులు. సీసీటీవి ఫుటేజీ ఆధారంగా దర్యాప్తు చేపట్టిన పోలీసులు.. నిందితుల్లో ఒకరిని అదుపులోకి తీసుకుని తుపాకీ స్వాధీనం చేసుకున్నారు. మరొకడు పరారీలో ఉన్నట్లు తెలిపారు.