కన్నడ ఎడిటర్ గౌరీ లంకేష్ హత్య: హంతకుడ్ని ఆమె చూశారు, అసలా రోజు ఏం జరిగిందంటే..
తనను కాల్చి చంపిన కిల్లర్ను గౌరీ లంకేష్ నేరుగా చూసినట్టు సీసీటీవీ దృశ్యాలను పరిశీలించిన సిట్ వర్గాలు తెలిపాయి. గౌరీ తొలుత తన ఇంటి తలుపు తీసి ఆయుధంతో తనను పిలిచిన కిల్లర్ను గమనించారు.
బెంగళూర్: తనను కాల్చి చంపిన కిల్లర్ను కన్నడ జర్నలిస్ట్, ఎడిటర్ గౌరీ లంకేష్ నేరుగా చూసినట్టు సీసీటీవీ దృశ్యాలను పరిశీలించిన సిట్ వర్గాలు తెలిపాయి. వారి కథనం ప్రకారం.. గౌరీ తొలుత తన ఇంటి తలుపు తీసి ఆయుధంతో తనను పిలిచిన కిల్లర్ను గమనించారు.
వెనువెంటనే దుండగుడు ఆమెపై కాల్పులకు తెగబడ్డాడు. మొదటి బుల్లెట్ ఆమె కుడి పక్కటెముకలోకి దూసుకుపోగా, రెండవ బుల్లెట్ ఎడమ పక్కటెముకకు తాకింది. తర్వాత రెండు అడుగులు వెనకకు వేసిన గౌరీ లంకేష్ గదిలో అటూ ఇటూ పరిగెత్తారు.
అదే సమయంలో రెండడుగులు ముందుకొచ్చిన కిల్లర్ మళ్లీ కాల్పులు జరపగా మూడో బుల్లెట్ గురితప్పింది. నాలుగో బుల్లెట్ ఆమె వెన్నులో నుంచి దూసుకెళ్లి ఛాతీనుంచి బయటకు వచ్చిందని సిట్ వర్గాలు చెప్పాయి.
నాలుగో బుల్లెట్ తగిలిన అనంతరం గౌరీ లంకేష్ 30 నుంచి 60 సెకన్లు మాత్రమే ప్రాణాలతో ఉండి ఉంటారని స్పెషల్ ఇన్వెస్టిగేషన్ టీం వర్గాలు పేర్కొన్నాయి.