ఫ్రెండ్‌పై రేప్: వీడియో తీసి నెట్‌లో పెట్టిన యువతులు

బరేలీ: ఉత్తరప్రదేశ్ రాష్ట్రంలోని బరేలీలో దిగ్ర్భాంతికర ఘటన చోటు చేసుకుంది. ఓ యువకుడు తమ స్నేహితురాలిపై అత్యాచారానికి పాల్పడుతుండగా ఇద్దరు యువతులు వీడియో తీశారు. అంతేగాక, ఆ వీడియోను ఇంటర్నెట్‌లో అప్‌లోడ్ చేశారు. ఘటనపై సమాచారమందుకున్న పోలీసులు, ఆ యువతులను అరెస్ట్ చేశారు. కాగా, అత్యాచారానికి పాల్పడిన నిందితుడు పరారీలో ఉన్నాడు.

వివరాల్లోకి వెళితే.. ఇంట్లో ఒంటరిగా ఉన్న సమయంలో 16ఏళ్ల బాధితురాలు తన ఇద్దరు స్నేహితురాళ్లను పిలిచింది. అయితే, వారు ఓ యువకుడిని వెంటబెట్టుకుని వచ్చారు. ఈ ముగ్గురు కలిసి ఆ యువతిని ఓ గదిలో బంధించారు. అనంతరం స్నేహితురాళ్లతో వచ్చిన యువకుడు తుపాకీతో బెదిరింపులకు గురి చేసి ఆమెపై అత్యాచారానికి పాల్పడ్డాడు.

కాగా, ఈ ఘటనను బాధితురాలి ఇద్దరు స్నేహితురాళ్లు తమ సెల్‌ఫోన్లలో వీడియో తీసి అనంతరం ఆన్‌లైన్‌లో అప్‌లోడ్ చేశారు. డిసెంబర్ 18న జరిగిన ఈ ఘటన ఆలస్యంగా వెలుగులోకి వచ్చింది. తన కూతురు.. దగ్గరి స్నేహితులని ఇంటిక రమ్మంటే వారు ఇంత ఘోరానికి పాల్పడ్డారని బాధితురాలి తండ్రి వాపోయాడు.

ముగ్గురు నిందితులపై పోలీసులు కేసు నమోదు చేసుకున్నారు. అత్యాచారానికి పాల్పడిన నిందితుడు అమన్ పరారీలో ఉన్నాడని పోలీసులు తెలిపారు. నిందితులైన బాధితురాలి ఇద్దరు స్నేహితురాళ్లను అరెస్ట్ చేసి విచారిస్తున్నట్లు చెప్పారు. ఘటన అనంతరం బాధితురాలు తీవ్ర ఒత్తిడిలో కూరుకుపోయి తన తల్లిదండ్రులకు కూడా ఏమీ చెప్పలేకపోయిందని తెలిపారు.

నిందితులు ఆన్‌లైన్‌లో అప్‌లోడ్ చేసిన వీడియోతోనే ఈ నేరం బహిర్గతమైందని పోలీసులు చెప్పారు. అనంతరం బాధితురాలి తండ్రి ఫిర్యాదు చేయడంతో కేసు నమోదు చేసి ఇద్దరు నిందితులను అరెస్ట చేశామని, మరో నిందితుడు పరారీలో ఉన్నాడని తెలిపారు. నిందితుడు అమన్ కోసం గాలింపు చేపట్టామని చెప్పారు.

English summary

In an incident that has shocked both parents and cops probing the matter, two schoolgirls allegedly filmed the rape of a friend at her house and uploaded the entire sequence online.