ఆఫీసులకు బికినీలు వేసుకొచ్చినా అనుమతించండి: కాంగ్రెస్ ఎమ్మెల్యే
పనాజీ: సాంస్కృతిక శాఖ సిబ్బందికి డ్రెస్ కోడ్ అంటూ గోవా ప్రభుత్వం జారీ చేసిన ఆదేశాలపై ఆ రాష్ట్ర కాంగ్రెస్ శాసనసభ్యుడు అలెక్సియో రెజినాల్డో లౌరెంకో తీవ్రంగా స్పందించారు. అంతేగాక, వివాదాస్పద వ్యాఖ్యలు కూడా చేశారు.
ఉద్యోగులు వారికి ఇష్టమైన దుస్తులతో ప్రభుత్వ కార్యాలయాలకు వచ్చేందుకు వెసులుబాటు కల్పించాల్సిందేనని ఆయన డిమాండ్ చేశారు. అంతటితో ఆగకుండా, ఉద్యోగులు వారికిష్టమైన బికినీలు ధరించి వచ్చినా వారిని అనుమతించాల్సిందేనని అన్నారు.
గోవా బడ్జెట్ సమావేశాలు జరుగుతున్న క్రమంలో గురువారం ఉదయం అసెంబ్లీ ప్రాంగణంలోనే ఈ వ్యాఖ్యలు చేశారు. కాగా, సాంస్కృతిక శాఖలో పని చేసే అధికారులు, సిబ్బంది కూడా స్లీవ్ లెస్ టాప్స్, జీన్స్, కోర్దురాయ్స్, టీ షర్ట్స్, ఎక్కువగా జేబులుండే ట్రౌజర్లను ధరించరాదని గోవా ప్రభుత్వం ఇటీవల ఆదేశాలు జారీ చేసింది.
ఈ ఆదేశాలపై మండిపడిన కాంగ్రెస్ సభ్యుడు రెజినాల్డో.. ప్రభుత్వ వైఫల్యాలను కప్పిపుచ్చుకునేందుకే ఇలాంటి ఆదేశాలు జారీ చేస్తోందని ఆరోపించారు. రెజినాల్డో వ్యాఖ్యలపై స్పందించాలని కోరగా.. తర్వాత మాట్లాడతామని సాంస్కృతిక శాఖ మంత్రి దయానంద్ మంద్రేకర్ దాటవేశారు.