ఆత్మహత్య చేసుకోవాలనుకుంటే కాపాడి.. 20రోజులపాటు రేప్ చేశాడు
ఫరీదాబాద్: హర్యానా రాష్ట్రంలో మరో దారుణం చోటు చేసుకుంది. ఓ 25ఏళ్ల వివాహిత ఆత్మహత్య చేసుకునేందుకు ప్రయత్నించగా ఓ వ్యక్తి ఆమెను ఆపాడు. ఆ తర్వాత మహిళపై 20 రోజులపాటు అత్యాచారానికి పాల్పడ్డాడు.
ఈ దారుణ ఘటన ఫరీదాబాద్లో చోటు చేసుకుంది. నిందితుడి వద్ద నుంచి ఎలాగోలా తప్పించుకున్న బాధితురాలు, పోలీసులను ఆశ్రయించింది. జరిగిన ఘటనపై పోలీస్ స్టేషన్లో ఫిర్యాదు చేసింది.
కేసు నమోదు చేసుకున్న పోలీసులు, సందీప్ అనే వ్యక్తి ఆమెపై అత్యాచారానికి పాల్పడినట్లు గుర్తించారు. తన తల్లి తిట్టడంతో ఆత్మహత్య చేసుకోవాలనే ఆలోచనతో మార్చి 17న బాధితురాలు ఇంటి నుంచి బయటికి వచ్చేసింది.
కాగా, ఆత్మహత్యకు ప్రయత్నించిన బాధితురాలిని నిందితుడు సందీప్ మాయమాటలు చెప్పి తనతో తీసుకెళ్లాడు. ఉద్యోగం ఇప్పిస్తానని చెప్పి, తన ఇంటికి తీసుకెళ్లి అత్యాచారానికి పాల్పడ్డాడు. ఆ తర్వాత ఘజియాబాద్కు తీసుకెళ్లిన సందీప్, ఓ తెల్ల కాగితం మీద సంతకం పెట్టించి, తనను వివాహం చేసుకోవాలని బాధితురాలిని బలవంతం చేశాడు.
తనకు వివాహం అయిందని చెప్పడంతో.. నిందితుడు 20 రోజులపాటు తనపై అత్యాచారానికి పాల్పడ్డాడని బాధితురాలు తన ఫిర్యాదులో పేర్కొంది. ఆ తర్వాత ఫరీదాబాద్లోని ఓ అద్దె గదికి తీసుకెళ్లిన నిందితుడు, తన ఇద్దరు స్నేహితులతోపాటు లైంగిక వేధించాడని తెలిపింది. అనంతరం తనను వదిలిపెట్టి పరారయ్యారని చెప్పింది.
బాధితురాలి ఫిర్యాదు మేరకు కేసు నమోదు చేసుకున్న పోలీసులు, నిందితుల కోసం గాలింపు చర్యలు చేపట్టినట్లు తెలిపారు.