నేను దేవతను కాదు, కానీ: రాధే మా, కొత్త చిక్కులు
ముంబై: సుఖ్వీందర్ కౌర్ అలియాస్ రాధే మా పోలీసుల విచారణలో ఆసక్తికర విషయాలు వెల్లడించినట్లుగా తెలుస్తోంది. తన పేరు కేవలం ముంబైలో మాత్రమే కాదని, ప్రపంచం మొత్తం తెలుసునని రాధే మా వ్యాఖ్యానించారని తెలుస్తోంది.
తాను దేవతను కాదని, కేవలం రాధే మా అని చెప్పింది. కాంధీవాలీ పోలీసులు రాధే మా స్టేట్మెంటును రికార్డు చేశారు. ముంబై హైకోర్టు రెండు వారాలపాటు ఆమెకు ముందస్తు బెయిల్ మంజూరు చేసింది. దీంతో ఆమెను పోలీసులు అరెస్టు చేయలేదు.
రాధే మా మత విశ్వాసాలను దెబ్బతీసిందని, దుర్గామాతను అవమానపరిచిందని లూథియానాకు చెందిన ఇద్దరు వ్యక్తులు ఆరోపించారు. రాధే మాకు వ్యతిరేకంగా లూథియానా కోర్టులో కేసు దాఖలు చేశారు.
దుర్గామాత అవతారంగా చెప్పుకునే ఆమె మినీ స్కర్టులు వేసుకొని తమ విశ్వాసాలకు భంగం కలిగించిందన్నారు. దీంతో ఆమెకు కొత్త చిక్కు వచ్చి పడింది. రాధే మా పైన కేసు పెట్టేందుకు ముంబై పోలీసులు సిద్ధమవుతున్నారు.
వివాదాలలో ఇరుక్కోవడంతో రాధే మా భక్తులకు దర్శనం ఇవ్వడం లేదు. తనకు అతీంద్రీయ శక్తులు ఉన్నాయంటూ ఎవరినీ మోసం చేయలేదని ఆమె పోలీసులకు చెప్పారు.