వేర్పాటువాద నాయకురాలు ఆసియా అంద్రాబీ అరెస్ట్
వేర్పాటువాద నాయకురాలు ఆసియా అంద్రాబీని గురువారం కాశ్మీర్ పోలీసులు అరెస్టు చేశారు. యువతను వేర్పాటువాదం వైపు మళ్లించేలా రెచ్చగొట్టే వ్యాఖ్యలు చేస్తోందనే ఆరోపణలున్న నేపథ్యంలో ఆమెను అదుపులోకి తీసుకున్నా
న్యూఢిల్లీ: వేర్పాటువాద నాయకురాలు ఆసియా అంద్రాబీని గురువారం కాశ్మీర్ పోలీసులు అరెస్టు చేశారు. యువతను వేర్పాటువాదం వైపు మళ్లించేలా రెచ్చగొట్టే వ్యాఖ్యలు చేస్తోందనే ఆరోపణలున్న నేపథ్యంలో ఆమెను అదుపులోకి తీసుకున్నారు. ప్రజా రక్షణ చట్టం కింద ఆమెను అరెస్టు చేశామని పోలీసులు తెలిపారు.
కాగా, ఇస్లామిస్ట్ వేర్పాటువాద సంస్థ దుక్త్రాన్-ఇ-మిల్లాట్కు అంద్రాబీ నాయకురాలు. అంతేగాక, ఆల్ పార్టీస్ హురియత్ కాన్ఫరెన్స్లోనూ ఆమె సభ్యురాలు. కాశ్మీర్లోయలో యువతను రెచ్చగొట్టేలా ఆసియా అంద్రాబీ తన ప్రసంగాలు కొనసాగిస్తోంది.
అంద్రాబీ ప్రసంగాలు తమ శిక్షణ శిబిరాల్లో ప్రసారం చేస్తారని గతంలో కొందరు ఉగ్రవాదులు చెప్పడంతో ఆమెపై నిఘా పెట్టాయి భద్రతా దళాలు. మరోవైపు ఆమెపై చర్యలు తీసుకోవాలని కేంద్రం కూడా భావిస్తున్నట్లు సమాచారం.
ఈ నేపథ్యంలో కాశ్మీర్ పోలీసులు గురువారం తెల్లవారుజామున ఆమెను అరెస్టు చేశారు. భద్రతాసిబ్బందిపైకి మహిళలు రాళ్లు విసరడం వెనుక అంద్రాబీ ప్రోత్సాహం ఉన్నట్లు తెలిసింది. కాగా, వేర్పాటు వాద నాయకుడు, హిజ్బుల్ ముజాహిదీన్ నేత ఆషిఖ్ హుస్సేన్ ఫఖ్తూ భార్యే ఈ ఆసియా అంద్రాబీ. ప్రస్తుతం ఆయన జైలులో ఉన్నాడు.
కాగా, కుప్వారాలో గురువారం ఉగ్రవాదులు, భద్రతా దళాలకు మధ్య కాల్పులు జరుగగా.. మేజర్ తోపాటు ఇద్దరు జవాన్లు అమరులయ్యారు. భద్రతా దళాల కాల్పుల్లో ఇద్దరు ఉగ్రవాదులు హతమయ్యారు. కాల్పులు కొనసాగుతున్నాయి.