ఢిల్లీ షాక్: బీజేపీలోకి జయప్రద, అమర్‌సింగ్ చర్చ: కేజ్రీవాల్‌పై పోటీ?

న్యూఢిల్లీ: ప్రముఖ సినీ నటి, మాజీ పార్లమెంటు సభ్యురాలు జయప్రద భారతీయ జనతా పార్టీలో చేరే అవకాశాలు కనిపిస్తున్నాయి. గురువారం ఆమె బీజేపీ జాతీయ అధ్యక్షులు అమిత్ షాతో భేటీ అయ్యారు. ఆమె ఒకటి రెండు రోజుల్లో కమలం పార్టీ తీర్థం పుచ్చుకోవచ్చు.

ఢిల్లీ ఎన్నికల్లో ఆమ్‌ ఆద్మీ సమన్వయకర్త, ఢిల్లీ మాజీ ముఖ్యమంత్రి కేజ్రీవాల్‌ పైన పోటీ చేసేందుకు తాను సిద్ధంగా ఉన్నట్లు జయప్రద చెప్పినట్లుగా తెలుస్తోంది. ఢిల్లీ ఎన్నికల్లో బీజేపీ తొలి జాబితాను విడుదల చేయనున్న నేపథ్యంలో ఈ అంశం ప్రాధాన్యత సంతరించుకుంది.

గత లోకసభ ఎన్నికల్లో జయప్రద బీజనూర్‌ నుంచి ఆరెల్డీ తరపున పోటీ చేసి ఓడిపోయారు. బీజేపీలో చేరేందుకు ఆమె ఇప్పటికే మూడుసార్లు పార్టీ నేతలతో సంప్రదింపులు జరిపారు. ఢిల్లీ నియోజకవర్గం నుంచి జయప్రద పోటీకి దిగే అవకాశాలు ఉన్నాయంటున్నారు.

ఈ సందర్భంగా జయప్రద గురువారం మీడియాతో మాట్లాడారు. బీజేపీలో చేరే విషయమై చర్చలు కొనసాగుతున్నాయన్నారు. ఆ సమయం వచ్చినప్పుడు తప్పకుండా చెబుతానన్నారు. అమర్ సింగ్ కూడా చర్చిస్తున్నారన్నారు. పాలనలో మార్పులు తీసుకు వచ్చే దిశగా ప్రధానమంత్రి నరేంద్ర మోడీ బాగా పని చేస్తున్నారని కితాబిచ్చారు. తనకు బీజేపీలో చేరాలని ఉందన్నారు.

ప్రధాని మోడీ పని చేస్తున్నారని, ఆయన పనితీరు బాగుందన్నారు. మోడీని ప్రధానిగా ఎన్నుకున్నందుకు ప్రజలకు ధన్యవాదాలు తెలిపారు. ఆయన నాయకత్వంలో పని చేయాలని ఉందని, ఒక కార్యకర్తగా పని చేస్తానన్నారు. తనకు పదవులపై ఎలాంటి ఆశ లేదన్నారు. బీజేపీలో చేరే విషయమే త్వరలో నిర్ణయం తీసుకుంటానన్నారు. కాగా, అరవింద్ కేజ్రీవాల్ పైన షాజియా ఇల్మీ కూడా పోటీకి దిగనుందనే ఊహాగానాలు వినిపించాయి.

English summary

Actor-turned-politician Jaya Prada on Thursday said she wants to join the BJP as she is impressed by Prime Minister Narendra Modi’s leadership.