లోక్‌సభ ఎన్నికలు 2019 : మూడో విడత పోలింగ్ ఉదయం నుంచి సాయంత్రం వరకు అప్ డేట్స్

ఢిల్లీ: 2019 సార్వత్రిక ఎన్నికల్లో భాగంగా దేశంలో మూడో విడత పోలింగ్ ప్రారంభమైంది. ఉదయం నుంచే ఓటు హక్కు వినియోగించుకునేందుకు ఓటర్లు క్యూలైన్లలో నిల్చున్నారు. తొలి రెండు దశల్లో ఇప్పటికే 70శాతం పోలింగ్ నమోదైనట్లు ఈసీ ప్రకటించింది. ఇక మంగళవారం జరగనున్న మూడో దశ పోలింగ్‌లో మొత్తం 13 రాష్ట్రాలు రెండు కేంద్రపాలిత ప్రాంతాల ఓటర్లు తమ ఓటు హక్కును వినియోగించుకోనున్నారు. మొత్తం 116 లోక్‌సభ స్థానాలకు పోలింగ్ జరగనుంది. మూడో దశ ఎన్నికల్లో మొత్తం 1600 మంది అభ్యర్థులు తమ అదృష్టాన్ని పరీక్షించుకోనున్నారు.

ఇదిలా ఉంటే ప్రధాని మోడీ సొంత రాష్ట్రం గుజరాత్‌లో మొత్తం 26 సీట్లకు ఒకేసారి ఎన్నిక జరగనుంది. కేరళలోని మొత్తం 20 సీట్లకు కూడా మూడో దశలోనే ఎన్నిక జరగనుంది. అయితే కేరళ నుంచి బీజేపీకి ఒక్క ఎంపీ సీటు కూడా రాని నేపథ్యంలో ఈ సారి అక్కడ ఖాతా తెరుస్తుందనే విశ్వాసం కమలనాథులు వ్యక్తం చేస్తున్నారు. ఈ సారి గుజరాత్‌లో గాంధీనగర్ నుంచి ఆరుసార్లు గెలిచిన ఎల్‌కే అద్వానీకి కాకుండా బీజేపీ జాతీయాధ్యక్షుడు అమిత్ షా పోటీ చేస్తున్నారు. ఇక కాంగ్రెస్ నుంచి రెండు సార్లు ఎమ్మెల్యేగా గెలిచిన సీజే చావడా అమిత్ షాకు ప్రత్యర్థిగా పోటీలో ఉన్నారు.

కేరళలో వాయనాడ్ స్థానం నుంచి కాంగ్రెస్ అధ్యక్షుడు రాహుల్‌గాంధీ బరిలో ఉన్నారు.ఇక్కడ బీజేపీ మిత్రపక్షం భారత్ ధర్మ జనసేన పార్టీ నుంచి తుషార్ వేలపల్లి పోటీలో ఉన్నారు. ఎర్నాకులం నుంచి శశిథరూర్ పోటీ చేస్తున్నారు. ఇక జమ్ము కశ్మీర్ లో అనంతనాగ్ నుంచి ఆ రాష్ట్ర మాజీ ముఖ్యమంత్రి మెహబూబా ముఫ్తీ పోటీలో ఉన్నారు. ఉత్తర్ ప్రదేశ్‌‌లో సమాజ్ వాదీ పార్టీ నుంచి ములాయం సింగ్ పోటీచేస్తున్నారు. రాంపూర్ నియోజకవర్గం నుంచి బీజేపీ అభ్యర్థిగా జయప్రద నిలుస్తుండగా... ఆమె ప్రత్యర్థి సిట్టింగ్ ఎంపీ అజాంఖాన్ బరిలో ఉంటారు.

English summary

The Election Commission said nearly 70 percent voter turnout was recorded in each of the two phases of the ongoing Lok Sabha polls. In the third phase on Tuesday, voters from 11 states and two Union Territories will cast ballots across 115 seats—the maximum number of Parliamentary constituencies going to vote—to choose from more than 1,600 candidates.