రాజకీయాల్లోకి వస్తా, షాకిస్తా: నటి నమిత
చెన్నై: అందాల నటి నమిత రాజకీయాల్లోకి ప్రవేశించబోతున్నారు. తద్వారా ఆమె తన జీవితంలో రెండో ఇన్నింగ్స్ ప్రారంభించబోతున్నారు. త్వరలోనే తాను రాజకీయాల్లోకి వస్తానని ఆమె చెప్పారు. తనకు తమిళ ప్రేక్షకులు ప్రత్యేకతను ప్రసాదించారని చెప్పారు.
తమిళులు తనకు గుర్తింపునిచ్చారని అన్నారు. అందుకే తమిళ ప్రజలకు మంచి చేసేందుకైనా రాజకీయాల్లోకి వస్తానని చెప్పారు. తనది గుజరాత్ రాష్ట్రమే అయినా సరికొత్త జన్మనిచ్చింది తమిళనాడు అయినందున తన జీవితాన్ని రాష్ట్రానికి అంకితం చేస్తానని ఆమె చెప్పారు.
పలు రాజకీయ పార్టీల నుంచి తనకు ఆహ్వానం వచ్చిందని, అయితే ఎవరు పిలిచారన్నది ఇప్పుడు చెప్పనని ఆమె అన్నారు. ఇప్పుడు స్లిమ్గా తయారై మీ అందరికీ (మీడియా) ఎలా షాకిచ్చానో, వచ్చే ఏడాది జరిగే తమిళనాడు అసెంబ్లీ ఎన్నికల్లో అందరికీ షాకివ్వబోతున్నానని చెప్పారు.
బరువు తగ్గడం అసాధ్యమని ఎంత మంది చెప్పినా దాన్ని ఎలా సుసాధ్యం చేశానో, అలాగే రాజకీయాల్లోనూ అనుకున్నది సాధించి తీరుతానని ఆమె ఆత్మవిశ్వాసాన్ని ప్రకటించారు. నమిత పలు తెలుగు సినిమాల్లో కూడా నటించారు.