రాహుల్ కాంగ్రెస్ అధ్యక్షుడిగా కొనసాగే అవకాశాలు అస్సలు లేవన్న సీనియర్ నేత

న్యూఢిల్లీ: రాహుల్ గాంధీ కాంగ్రెస్ అధ్యక్షుడిగా కొనసాగేందుకు ఒక్క శాతం కూడా అవకాశం లేదనే సంచలన వ్యాఖ్యలు చేశారు కాంగ్రెస్ సీనియర్ నాయకుడు వీరప్పమొయిలీ. రాహుల్ గాంధీ కాంగ్రెస్ అధ్యక్షుడిగా కొనసాగేందుకు మనసు మార్చుకుంటారా అని ప్రశ్నించినప్పుడు వీరప్ప మొయిలీ ఈ సమాధానం చెప్పారు. ఏదైనా జరిగే అవకాశం ఉందని చెబుతున్నారు. సీడబ్ల్యూసీ ఈ అంశంపై చర్చిస్తోందని వీరప్పమొయిలీ చెప్పారు.

ఇక కాంగ్రెస్ టాప్‌ పోస్టు కోసం మరొకరి పేరు ప్రతిపాదించే ముందు కాంగ్రెస్ వర్కింగ్ కమిటీలో చర్చించడం జరగుతుందని మొయిలీ అన్నారు. ఇంకా సీడబ్ల్యూసీ రాహుల్ గాంధీ రాజీనామాను ఆమోదించలేదని చెప్పారు. అప్పటి వరకు ఇలాంటి వార్తలు ప్రచారంలో ఉండనే ఉంటాయని మొయిలీ చెప్పారు. లోక్‌సభలో కాంగ్రెస్ పార్టీ ఘోరంగా దెబ్బతిన్న తర్వాత ఓటమికి బాధ్యత వహిస్తూ రాహుల్ గాంధీ కాంగ్రెస్ అధ్యక్ష పదవికి రాజీనామా చేసిన సంగతి తెలిసిందే. పార్టీలో సమూల మార్పులు రావాలంటే అది అగ్రనాయకత్వం నుంచే ప్రారంభం కావాలని పేర్కొంటూ ఆయన తన పదవికి రాజీనామా చేశారు.

కాంగ్రెస్ పార్టీలో అధ్యక్షపదవికి సరైన వ్యక్తి దొరికేవరకు ఆ పదవిలో కొనసాగుతానని స్పష్టం చేశారు.ఇదిలా ఉంటే చాలామంది కాంగ్రెస్ నాయకులు రాహుల్ గాంధీ అధ్యక్షపదవిలో కొనసాగుతేనే భవిష్యత్తు ఉంటుందని భావిస్తున్నారు. ఈ క్రమంలోనే రాహుల్ గాంధీకి నచ్చజెప్పేందుకు ఆయన ఇంటికి క్యూ కట్టారు నేతలు. ఎవరు ఎన్ని విధాలా ఒప్పించే ప్రయత్నం చేసినప్పటికీ రాహుల్ గాంధీ మాత్రం తన మొండి పట్టుదలను వీడటం లేదు. తన రాజీనామాను ఆమోదించాలనే చెబుతున్నారు. మరోవైపు రాహుల్ గాంధీ స్థానంలో కాంగ్రెస్ అధ్యక్ష పదవిని అతని సోదరి ప్రియాంకా గాంధీ చేపడుతారా అని మొయిలీని అడుగగా ఏ నిర్ణయం అయినా కాంగ్రెస్ వర్కింగ్ కమిటీ సమావేశంలో తీసుకోవడం జరుగుతుందని స్పష్టం చేశారు.ఇదిలా ఉంటే లోక్‌సభ ఎన్నికల్లో ఘోరంగా కాంగ్రెస్ పార్టీ ఓటమిపాలవడంతో పార్టీకి మేజర్ సర్జరీ చేయాల్సిన అవసరం ఉందని మొయిలీ రెండు వారాల క్రితం వ్యాఖ్యానించిన సంగతి తెలిసిందే.

English summary

Senior Congress leader M Veerappa Moily Friday said there is not even one per cent possibility of Rahul Gandhi continuing as party president.On being asked about the possibility of Gandhi changing his decision, the veteran leader said that the Congress Working Committee (CWC) would be deciding on the matter. “Anything can happen,” he said.