కారు, బైకుల నిండా మద్యం బాటిళ్లే: 7500 లీటర్ల లిక్కర్ ను స్వాధీనం చేసుకున్న ఎక్సైజ్ అధికారులు

శివమొగ్గ: ఎన్నికల గడువు సమీపిస్తుండటంతో రాష్ట్రంలో మద్యం ఏరులై పారుతోంది. ధన ప్రవాహం ముంచెత్తుతోంది. భారీగా నగదును, వెండి, బంగారు వస్తువలను స్వాధీనం చేసుకున్న పోలీసులు.. తాజాగా మద్యాన్ని సీజ్ చేశారు. ఈ మద్యం విలువ 35 లక్షల రూపాయలకు పైగా ఉంటుందని ఎక్సైజ్ శాఖ, పోలీసులు అంచనా వేస్తున్నారు. కర్ణాటకలో ఈ ఘటన చోటు చేసుకుంది. ఈ మద్యాన్ని ఏపీ, తెలంగాణ రాష్ట్రాలకు తరలిస్తున్నట్లుగా ప్రాథమికంగా అంచనా వేశారు.

సార్వత్రిక ఎన్నికల నోటిఫికేషన్ వెలువడటంతో దేశవ్యాప్తంగా ప్రవర్తనా నియమావళి అమల్లోకి వచ్చింది. దీన్ని దృష్టిలో ఉంచుకుని ఎక్సైజ్ శాఖ అధికారులు, పోలీసులు ఉమ్మడిగా నాలుగు రోజులుగా అన్ని వాహనాలను తనిఖీ చేస్తున్నారు. ఈ క్రమంలో- కర్ణాటకలోని శివమొగ్గ జిల్లాలో పోలీసులు చేపట్టిన వాహనాల తనిఖీలో పెద్ద ఎత్తున మద్యం బాటిళ్లువెలుగు చూశాయి. 7,526 లీటర్ల మద్యాన్ని స్వాధీనం చేసుకున్నట్లు శివమొగ్గ జిల్లా ఎక్సైజ్ శాఖ డిప్యూటీ కమిషనర్ బసవరాజ్ తెలిపారు. ఈ మద్యం విలువ 35, 21, 491 రూపాయలుగా ఉంటుందని అంచనా వేసినట్లు చెప్పారు.

మద్యం బాటిళ్లతో పాటు రెండు బైకులను స్వాధీనం చేసుకున్నామని, ఈ కేసులో ఏడుమందిని అరెస్టు చేశామని అన్నారు. వారిని జ్యూడీషియల్ కస్టడీకి పంపించినట్లు చెప్పారు. ఏపీ, తెలంగాణలకు తరలిస్తున్నట్లు తాము అనుమానిస్తున్నామని, మరిన్ని వివరాలను సేకరించాల్సి ఉందని అన్నారు.

English summary

Police and Excise Department Officials jointly recovered Huge account of Liquor in Shivamogga, Karnataka. Deputy Commissioner for Excise Department Basavaraj said reporters that, We carried out search operation on 12 Mar at 18 locations in Shivamogga circle and seized 7526.160 litre of illegal liquor. The value of the Liquor at Rs. 35,21491 assessed. He told Two bikes and seven people sent to judicial custody.