చంపేస్తామన్నారు: రాహుల్, ప్రియాంకలపై ఆప్ అభ్యర్థి
అమేథి: ఆమ్ ఆద్మీ పార్టీ లోకసభ అభ్యర్థి కుమార్ విశ్వాస్ సంచలన వ్యాఖ్యలు చేశారు. కాంగ్రెస్ పార్టీ ఉపాధ్యక్షుడు రాహుల్ గాంధీ, అతని సోదరి ప్రియాంక గాంధీ వాద్రాల సన్నిహితుడు ఒకరు తనను చంపుతానని బెదిరింపులకు గురి చేశాడని కుమార్ విశ్వాస్ చెప్పారు. ఈ మేరకు వివరాలను తన ట్విట్టర్ ఖాతాలో పేర్కొన్నారు.
అంతేగాక అందుకు సంబంధించిన ఓ వీడియోను కూడా పోస్ట్ చేశారు. ఆ వీడియోలో ఓ వ్యక్తి ప్రియాంక గాంధీ కారు వెంట పరుగెడుతూ.. కుమార్ విశ్వాస్ను షూట్ చేస్తానని అంటున్నాడు. ఇందుకు ప్రతిగా స్పందించిన ప్రియాంక గాంధీ, ఈ విధంగా మాట్లాడ కూడదని వారించారు. చర్చించేందుకు ఓసారి తన గెస్ట్ హౌజ్కి రావాలని చెప్పారు.
ఇది ఇలా ఉండగా కుమార్ విశ్వాస్ ఇలాంటి ఆరోపణలు చేయడం సరికాదని ప్రియాంక గాంధీ అన్నారు. తన మాటలను తప్పుగా అర్థం చేసుకున్నారని, తన గెస్ట్ హౌజ్కి వస్తే చర్చించుకోవచ్చని చెప్పారు. రాహుల్ గాంధీ తరపున ప్రచారం చేస్తున్న సందర్భంలో ఈ ఘటన చోటుచేసుకుంది.
కాగా, రాహుల్ గాంధీ పోటీ చేస్తున్న అమేథి లోకసభ నియోజక వర్గం నుంచి ఆమ్ ఆద్మీ పార్టీ తరపున కుమార్ విశ్వాస్ నామినేషన్ వేశారు. కవిగా సుపరిచితుడైన కుమార్ విశ్వాస్ ప్రస్తుతం ఓట్ల వేటలో పడ్డారు. తమ పార్టీకి మద్దతుగా నిలవాలని నియోజకవర్గంలో పర్యటిస్తూ ప్రజలను కోరుతున్నారు. ఇది ఇలా ఉండగా రాహుల్ గాంధీకి ప్రధాన ప్రత్యర్థిగా భారతీయ జనతా పార్టీ నుంచి పోటీ చేస్తున్న స్మృతి ఇరానీ ఉన్నారు.