అభద్రతలో యూపీ ప్రభుత్వం.. అందుకే ప్రియాంకను అరెస్ట్ చేశారన్న రాహుల్
కాంగ్రెస్ జనరల్ సెక్రటరీ ప్రియాంక గాంధీని యూపీ పోలీసులు అడ్డుకోవడంపై ఆమె సోదరుడు రాహుల్ గాంధీ తీవ్రంగా స్పందించారు. యోగి ప్రభుత్వంలో అభద్రతాభావం పెరిగిపోయిందనడానికి ఈ ఘటనే నిదర్శనమని అన్నారు. ఈ మేరకు ట్విట్టర్లో ఆయన ట్వీట్ చేశారు. అయితే ప్రియాంకను అరెస్ట్ చేయలేదని యూపీ పోలీసులు చెబుతున్నా.. రాహుల్ మాత్రం ట్విట్టర్లో ఆమెను అరెస్ట్ చేసినట్లు చెప్పారు.
యోగిని పొగిడిన ప్రియాంక గాంధీ .. ఎందుకో తెలుసా..?
అభద్రతకు నిదర్శనం
సోంభద్రలో ప్రియాంకను అక్రమంగా అరెస్ట్ చేయడం ఆందోళనకరమని రాహుల్ అభిప్రాయపడ్డారు. తమ సొంత భూమి నుంచి వెళ్లేందుకు నిరాకరించిన 10 మంది ఆదివాసీలను అతిదారుణంగా కాల్చి చంపారని విమర్శించారు. వారి కుటుంబాలను పరామర్శించేందుకు వెళ్లిన ప్రియాంకను పోలీసులు అడ్డుకోవడం యూపీలో బీజేపీ ప్రభుత్వ అభద్రతాభావం పెరుగుతోందనడానికి నిదర్శనమని రాహుల్ ట్వీట్ చేశారు. దీనికి సంబంధఇంచి రాహుల్ ట్విట్టర్లో ఓ వీడియో పోస్ట్ చేశారు.
గ్రామపెద్ద కాల్పుల్లో 10 మంది మృతి
రెండు రోజుల క్రితం సోంభద్ర జిల్లాలోని ఉబ్బా అనే ఊరిలో గ్రామ పెద్ద, స్థానికులకు మధ్య జరిగిన ఘర్షణలో 10 మంది మృతి చెందారు. 36 ఎకరాల భూమిని గ్రామపెద్ద ఆక్రమించుకునేందుకు వెళ్లగా స్థానిక రైతులు అడ్డుకున్నారు. దీంతో ఆగ్రహించిన గ్రామపెద్ద అనుచరులతో కలిసి కాల్పులకు తెగబడ్డాడు. ఈ దాడిలో ప్రాణఆలు కోల్పోయిన వారి కుటుంబాలను పరామర్శించేందుకు ప్రియాంక వెళ్తుండగా.. పోలీసులు అడ్డుకున్నారు.
ప్రియాంకను అరెస్ట్ చేసినట్లు పుకార్లు
సోంభద్రకు వెళ్తున్న ప్రియాంకను అరెస్ట్ చేసినట్లు ఊహాగానాలు వినిపించాయి. ఈ నేపథ్యంలో యూపీ డీజీపీ స్పందించారు. ఆమెను అరెస్ట్ చేయలేదని, సోంభద్రలో 144 సెక్షన్ విధించినందున ప్రియాంకను అక్కడకు వెళ్లకుండా పోలీసులు అడ్డుకున్నారని స్పష్టం చేశారు.