ఇదీ లెక్క.. వారం రోజుల్లో ఎన్ని లక్షల కోట్లు జమయ్యాయంటే!
ఢిల్లీ: పెద్ద నోట్ల రద్దు ఎఫెక్ట్ తో సామాన్యుల తిప్పలు ఎలా ఉన్నా.. బ్యాంకుల ఖజానా మాత్రం కళకళలాడుతోంది. భారీ మొత్తంలో డిపాజిట్లు వచ్చి చేరుతుండడంతో.. బ్యాంకింగ్ రంగానికి నోట్ల రద్దు ఎఫెక్ట్ కలిసొచ్చిందనే చెప్పాలి. ప్రజలంతా గంటల తరబడి బారులు తీరి మరీ డిపాజిట్లు చేస్తుండడంతో... వారం రోజుల వ్యవధిలోనే 3లక్షల 75 వేల కోట్ల రూపాయలు బ్యాంకుల్లో డిపాజిట్ అయ్యాయి.
నవంబర్ 24 దాకా పాత నోట్లను మార్చుకోవడానికి గడువు ఉండడంతో.. ఆలోపు దాదాపు 10లక్షల కోట్లు బ్యాంకుల్లో డిపాజిట్ అయ్యే అవకాశముందనేది ప్రభుత్వ అంచనా. ఆసుపత్రులు, పెట్రోలు బంకులు, ఇతర పబ్లిక్ సేవా రంగాల నుంచి జమయ్యే పాత నోట్లను కూడా కలిపితే రూ.12లక్షల కోట్ల వరకు డిపాజిట్లు పెరగవచ్చునని ప్రభుత్వ వర్గాలు అభిప్రాయపడుతున్నాయి.
తొలుత 16.6లక్షల కోట్ల దాకా ప్రభుత్వ ఖజానాకు చేరుతుందని అంచనా వేసినప్పటికీ.. అంత మొత్తం బ్యాంకుల్లో జమయ్యే సూచనలు లేవనే చెప్పాలి. అయితే మార్చి,2016నాటికి 16.6లక్షల కోట్ల రూపాయల డిపాజిట్లు బ్యాంకుల్లో జమవుతాయని రిజర్వ్ బ్యాంకు అఫ్ ఇండియా అంచనా వేస్తోంది.