షాకింగ్: తరగతి గదిలోనే.. విద్యార్థిని మెడలో తాళి కట్టిన బాలుడు, నెట్లో వీడియో హల్చల్
చెన్నై: బాల్య వివాహాలు నేరం అని తెలిసినా అవి ఆగడం లేదు. తాజాగా తరగతి గదిలోనే ఓ విద్యార్థిని మెడలో బాలుడు తాళికడుతున్న వీడియో ఒకటి సామాజిక మాధ్యమాల్లో హల్చల్ చేస్తోంది.
29 సెకండ్ల నిడివి ఉన్న ఈ వీడియోలో ఓ బాలుడు చేతిలో తాళి పట్టుకుని 'అమ్మా' అంటూ మొబైల్ వైపు చూస్తాడు. ఆ వెంటనే 'తాళి కట్టరా' అంటూ తమిళంలో మహిళ గొంతు వినిపిస్తుంది.
ఆ వెంటనే స్కూలు యూనిఫాం ధరించి ఉన్న సదరు బాలిక మెడలో ఆ బాలుడు తాళి కట్టేశాడు. అసలీ జంట ఎవరు? ఈ పెళ్లి ఎక్కడ జరిగిందన్న దానిపై వివరాలేమీ లేవు. ఆ విద్యార్థిని ముఖం స్పష్టంగా కనిపించకుండా ఈ వీడియో చిత్రీకరించారు.
సోషల్ మీడియాలో ఈ వీడియో హల్చల్ చేస్తుండడంతో బాలల హక్కుల సంరక్షణ సంస్థల ప్రతినిధులు, పోలీసులు ఈ జంట కోసం ముమ్మర గాలింపు మొదలుపెట్టారు. దీనిపై బాలల హక్కుల సంరక్షణ సంస్థ కార్యకర్త ఒకరు మాట్లాడుతూ ఈ ఘటన ఎక్కడ జరిగిందో తెలుసుకునేందుకు తాము ప్రయత్నిస్తున్నామన్నారు.
వీడియోలో కనిపిస్తున్న బాలిక ప్రభుత్వ పాఠశాల యూనిఫాం ధరించి ఉందని, అన్ని ప్రభుత్వ స్కూళ్లలోని విద్యార్థినులూ అదే యూనిఫాం ధరిస్తారు కాబట్టి ఈ ఘటన ఏ స్కూలులో జరిగిందో కనుక్కోవడం కష్టతరంగా మారిందని చెప్పారు.
జిల్లా బాలల సంరక్షణ అధికారి మాట్లాడుతూ.. 'మేం తమిళనాడు రాష్ట్రంలోని అన్ని జిల్లాల బాలల సంరక్షణ అధికారులను అప్రమత్తం చేశాం. ఈ ఘటన ఏ జిల్లాలో జరిగిందో కనుక్కోమని సూచించాం. ప్రస్తుతం ఉన్న సమాచారం మేరకు చూస్తే.. ఇది చెన్నైలోనే ఏదో ప్రభుత్వ పాఠశాల తరగతి గదిలో జరిగినట్లు తెలుస్తోంది. మరోవైపు ఈ వీడియో ఎక్కడ్నుంచి అప్లోడ్ అయిందో కూడా తెలుసుకోమని సైబర్ క్రైమ్ పోలీసులను కూడా కోరాం..' అని వివరించారు.