వారి నుంచి కాపాడ్డానికి తీసుకెళ్లారు, అబ్బాయితో ఎందుకంటూ.. పోలీసులే ఆమెను కొట్టారు
లక్నో: మరో వర్గం అబ్బాయితో సన్నిహితంగా ఉంటోందని ఓ యువతిని పోలీసులు వ్యానులో వేధించారు. ఈ సంఘటన యూపీలోని మీరట్లో చోటు చేసుకుంది. దానిని పోలీసులు వీడియో కూడా తీశారు. ఇది సోషల్ మీడియాలో చక్కెర్లు కొడుతోంది. దీనిపై విమర్శలు వెల్లువెత్తగా, సదరు పోలీసులను అధికారులు సస్పెండ్ చేసి, దర్యాఫ్తుకు ఆదేశాలు జారీ చేశారు.
ఆ వీడియిలో ఓ యువతిని పోలీసులు వాహనంలోకి ఎక్కించుకున్నారు. ఆమె పక్కన ఓ మహిళా పోలీసు ఉన్నారు. మరో ముగ్గురు పోలీసులు కూడా ఉన్నారు. సదరు మహిళా కానిస్టేబుల్ ఆ యువతిపై మూడు నాలుగుసార్లు చేయి చేసుకున్నారు. మరో పోలీసు ఆ యువకుడితోనే ఎందుకు సన్నిహితంగా ఉంటున్నావని ప్రశ్నించాడు.
ముందు కూర్చున్న ఓ పోలీసు వాహనాన్ని నడుపుతూనే వీడియో కూడా తీశాడు. కాగా, ఈ వీడియో ఎలా బయటకు వచ్చిందో తెలియాల్సి ఉంది. అంతకుముందు, ఈ యువతి తన స్నేహితుడైన ఓ మరో వర్గం యువకుడి ఇంటికి వెళ్లింది. వైద్య విద్యార్థులైన ఇద్దరు కలిసి చదువుకుంటుండగా అక్కడకు చేరుకున్న వీహెచ్పీ కార్యకర్తలు వారిద్దరిని పోలీసులకు అప్పగించారు. వారిద్దరు ప్రేమించుకుంటున్నారని, లవ్ జిహాద్ కారణమన్నారు.
Meerut: Three police personnel including a woman constable suspended after a video of them abusing and slapping a woman for being friends with a Muslim man, went viral pic.twitter.com/ypqO5dxFbK
— ANI UP (@ANINewsUP) September 25, 2018
వారిపై వీహెచ్పీ కార్యకర్తలు దాడి చేయకుండా ఆ యువతిని కాపాడేందుకు పోలీసులు ఆమెను తమ వాహనంలో ఎక్కించుకున్నారు. కానీ ఆ తర్వాత వారే స్వయంగా చేయి చేసుకున్నారు. యువతిని, యువకుడిని వేర్వేరు వాహనాల్లో తీసుకెళ్లారు.
దీనిపై పోలీసు అధికారి ఒకరు మాట్లాడుతూ... పోలీసులు తమ బాధ్యత మరిచిపోయారని, అందుకే వారిని సస్పెండ్ చేశామని, దర్యాఫ్తు చేస్తున్నామని, నివేదిక ఆధారంగా చర్యలు తీసుకుంటామని చెప్పారు.