ఘోర రోడ్డు ప్రమాదం... ట్రక్కును ఢీకొట్టిన బస్సు... ఏడుగురు మృతి...

ఛత్తీస్‌గఢ్‌లోని రాయ్‌పూర్‌లో ఘోర రోడ్డు ప్రమాదం జరిగింది. ఓ బస్సు-ట్రక్కు ఢీకొన్న ఘటనలో ఏడుగురు మృతి చెందగా... పలువురికి తీవ్ర గాయాలయ్యాయి. శనివారం(సెప్టెంబర్ 5) తెల్లవారుజామున రాయ్‌పూర్‌లోని చెరీ ఖేడీ వద్ద ఈ ప్రమాదం జరిగింది.

మృతులంతా వలస కార్మికులేనని తెలుస్తోంది. ప్రమాదానికి గురైన ఆ బస్సు ఒడిశాలోని గంజాం నుంచి గుజరాత్‌లోని సూరత్‌కు వలస కార్మికులను తరలిస్తున్నట్లుగా పోలీసులు గుర్తించారు. రాయ్‌పూర్ ఎస్ఎస్‌పీ అజయ్ యాదవ్ మాట్లాడుతూ... ప్రమాదంలో ఏడుగురు మృతి చెందగా,మరో ఏడుగురు తీవ్రంగా గాయపడినట్లు చెప్పారు.

బస్సును ట్రక్కును ఢీకొట్టడంతో ప్రమాదం జరిగిందన్నారు. ఘటనపై స్థానిక పోలీసులు కేసు నమోదు చేసుకుని దర్యాప్తు చేస్తున్నట్లు చెప్పారు. ఈ ఘటనకు సంబంధించి మరిన్ని వివరాలు తెలియాల్సి ఉంది.