నిర్మానుష్య ప్రదేశంలో కారు ఆపి.. గాయనిపై ఓలా డ్రైవర్ అత్యాచార యత్నం
రాత్రి పూట క్యాబ్ లో ఇంటికి తిరిగి వెళుతున్న ఓ గాయనిపై అదను చూసుకుని డ్రైవర్ అత్యాచార యత్నానికి పాల్పడిన ఉదంతమిది.
బెంగళూరు: తన విధులు ముగించుకుని తెల్లవారుజామున క్యాబ్ లో ఇంటికి తిరిగి వెళుతున్న ఓ గాయనిపై అదను చూసుకుని డ్రైవర్ అత్యాచార యత్నానికి పాల్పడిన ఉదంతమిది. ఆ కామాంధుడి బారి నుంచి తప్పించుకున్న అనంతరం సదరు గాయని తన స్నేహితుల సహాయంతో ఈ ఘటనపై పోలీసులకు ఫిర్యాదు చేసింది.
బొమ్మనహళ్లి పోలీసుల కథనం ప్రకారం... ఆరోజు తెల్లవారుజామున తన విధులు ముగించుకున్న గాయని కోరమంగళ నుంచి బేగూర్ కు ఓలా క్యాబ్ లో ఇంటికి బయలుదేరింది. క్యాబ్ డ్రైవర్ రవికుమార్ ఓ ఐదు కిలోమీటర్ల దూరం వెళ్లాక బొమ్మనహళ్లి సిగ్నల్ దాటిన తరువాత గబుక్కున మరో రోడ్డులోకి పోనిచ్చాడు.
అది గమనించిన గాయని రూట్ ఎందుకు మార్చావంటూ ప్రశ్నించింది. ఆ మార్గంలో రోడ్డు సరిగా లేదని చెప్పిన డ్రైవర్ రవికుమార్ కొంతదూరం వెళ్లాక నిర్మానుష్య ప్రదేశంలో కారును ఆపాడు. డోర్ తీసుకుని దిగొచ్చి.. బ్యాక్ డోర్ తీసి గాయని పక్కన కూర్చుని ఆమెపై చేయి వేశాడు.
కీడు శంకించిన ఆమె గట్టిగా కేకలు వేస్తూ అతడి నుంచి తప్పించుకునేందుకు ప్రయత్నించింది. బలవంతంగా కారు డోర్ తీసుకుని కిందికి దిగింది. అయినా రవికుమార్ వదలకుండా ఆమె వెంటపడడంతో గాయని గట్టిగా కేకలు వేసింది.
ఆ కేకలకు ఎవరైనా వస్తారేమో అన్న భయంతో డ్రైవర్ రవికుమార్ అక్కడ్నించి పరారయ్యాడు. ఆ సమయంలో సహాయానికి కూడా వచ్చే వారెవరూ లేకపోవడంతో గాయని వడివడిగా నడుచుకుంటూ సమీపంలోని లక్ష్మి స్పెషాలిటీ ఆసుపత్రికి చేరుకుంది.
అక్కడ్నించి తన స్నేహితులకు ఫోన్ చేసింది. తరువాత వారి సలహా మేరకు ఈ ఘటనపై బొమ్మనహళ్లి పోలీసులకు ఫిర్యాదు చేసింది. గాయని ఇచ్చిన ఫిర్యాదు మేరకు ఓలా క్యాబ్ డ్రైవర్ పై పోలీసులు కేసు నమోదు చేశారు.
కేసు నమోదైందని తెలియగానే డ్రైవర్ రవికుమార్ తన ఇంటి నుంచి కూడా పరారయ్యాడు. ప్రస్తుతం పోలీసులు అతడి కోసం గాలిస్తున్నారు. మరోవైపు ఓలా యాజమాన్యం కూడా సమాచారం అందగానే ఈ ఘటనకు పాల్పడిన డ్రైవర్ రవికుమార్ ను బ్లాక్ లిస్ట్ లో పెట్టింది.