తప్పుడు సర్టిఫికేట్లు: గంగూలీ అకాడమీపై నిషేధం
వయో పరిమితి క్రికెట్లో తప్పుడు ధృవపత్రాలతో వయస్సును తక్కువ చూపారన్న కారణంతో 42 మంది ఆటగాళ్లపైనా బెంగాల్ క్రికెట్ అసోసియేషన్ రెండేళ్లపాటు నిషేధం విధించింది. వయసు విభాగాల్లో జరిగే క్రికెట్ టోర్నీల్లో ఈ జాడ్యాన్ని అరికట్టేందుకు బెంగాల్ క్రికెట్ అసోసియేషన్ ఈ నిర్ణయం తీసుకున్నట్లు తెలుస్తోంది.
మరోసారి ఇలాంటి తప్పులు చేస్తే చాలా కఠినంగా ఉంటామని, కోచింగ్ సెంటర్లపై జీవిత కాల నిషేధం, ఆటగాళ్లపై పదేళ్ల నిషేధం విధిస్తామని క్యాబ్ హెచ్చరించింది. సెప్టెంబర్ నెలలో జరిగిన అండర్-14 సబ్ జూనియర్, అండర్-17 జూనియర్ టోర్నమెంట్లలో ఆటగాళ్ల వయస్సులపై విచారణ జరిపిన క్యాబ్ గురువారం ఈ నిర్ణయం ప్రకటించింది.
క్యాబ్ తనిఖీ చేస్తుందన్న ఉద్దేశంతో ఆటగాళ్ల ధృవపత్రాలను తాము తనిఖీ చేయకుండా వదిలేశామని సాల్ట్లేక్లోని సౌరవ్ గంగూలీ అకాడమీకి చెందిన ఓ అధికారి పేర్కొన్నారు. అయితే మళ్లీ ఇలాంటి తప్పు జరగకుండా చూసుకుంటామని ఆయన తెలిపారు.