పైకి షూటింగ్, లోపల చీకటి దందా: ఫాంహౌజ్లో వెలుగుచూసిన క్యాసినో..
బయటి వ్యక్తులకు మాత్రం అక్కడేదో షూటింగ్ జరుగుతుందన్న భ్రమ కల్పించేలా ఏర్పాట్లు చేసినట్లు తెలుస్తోంది.
న్యూఢిల్లీ: గుట్టు చప్పుడు కాకుండా నిర్వహిస్తున్న జూద కార్యకలాపాలను ఢిల్లీ పోలీసులు బట్టబయలు చేశారు. డేరా మండీలో కాసినో తరహాలో ఈ చీకటి దందా కొనసాగుతున్నట్లు గుర్తించారు. పైగా.. బయటి వ్యక్తులకు మాత్రం అక్కడేదో షూటింగ్ జరుగుతుందన్న భ్రమ కల్పించేలా ఏర్పాట్లు చేసినట్లు తెలుస్తోంది.
పోలీసుల కథనం ప్రకారం.. ఢిల్లీలోని డేరామండీ ప్రాంతంలో 13 ఎకరాల లగ్జరీ ఫామ్ హౌస్ ఉంది. సినిమా షూటింగ్స్ నిమిత్తం ఇక్కడో డమ్మీ క్యాసినో బార్ కూడా ఏర్పాటు చేశారు. కానీ షూటింగ్స్ పేరుతో ఇటీవల ఇక్కడ నిజంగానే క్యాసినో నిర్వహిస్తున్నారన్న ఆరోపణలున్నాయి. చాలారోజుల నుంచి దీనిపై ఫోకస్ చేసిన పోలీసులు.. పక్కా సమాచారంతో దాడులు నిర్వహించారు.
దాడుల్లో జూదం ఆడుతున్న 14 మంది సహా ఐదుగురు యువతులు పట్టుబడ్డారు. 13 లగ్జరీ కార్లను స్వాధీనం చేసుకున్నారు. దాంతో పాటు లక్షల విలువైన గ్యాంబ్లింగ్ చిప్స్ కూడా అక్కడ లభించాయి. కాగా, గోవా, సిక్కిం, డామన్ లలో మాత్రమే ఇండియాలో క్యాసినోలకు అనుమతి ఉంది. డేరామండీలో అక్రమంగా క్యాసినో నిర్వహిస్తుండటంతో వారిపై కేసులు నమోదు చేశారు.