పొట్టి గౌను వేసుకున్న పెద్దపాపకు నో ఎంట్రీ
ముంబై: పొట్టి దుస్తులు వేసుకుందని ఓ మహిళా ప్రయాణికురాలికి ఇండిగో విమానంలో చేదు అనుభవం ఎదురైయ్యింది. ఆమెకు విమానం మిస్ కావడంతో వేరే విమానంలో ముంబై నగరం నుంచి న్యూఢిల్లీ బయలుదేరి వెళ్లారు.
ఓ మహిళ ఫ్రాక్ వేసుకుని ఖతార్ ఎయిర్ వేస్ విమానంలో దోహా నుంచి ముంబై చేరుకుంది. అక్కడి నుంచి ఢిల్లీకి కనెక్టడ్ విమానం (ఇండిగో) ఎక్కాల్సి ఉంది. ముంబై నుంచి ఢిల్లీ బయలుదేరడానికి ఇండిగో విమానం సిద్దంగా ఉంది. ఆ మహిళా ప్రయాణికురాలు ఇండిగో విమానం ఎక్కారు.
అయితే ఆమె ఫ్రాక్ వేసుకుందని, ఇంతటి పొట్టి దుస్తులు వేసుకుంటే తమ విమానంలో ప్రయాణించడానికి అనుమతిఇవ్వమని ఇండిగో సిబ్బంది చెప్పారు. ఆమెను ఆ విమానం నుంచి కిందకు దించివేశారు.
అదే విమానంలో ఉన్న సాటి మహిళా ప్రయాణికురాలు పురభి దాస్ ఈ సంఘటన వివరాలను తన ఫేస్ బుక్ లో పోస్టు చేశారు. ఆ మహిళ పట్ల ఇండిగో విమానం పురుష సిబ్బంది అమానుషంగా ప్రవర్తించారని విచారం వ్యక్తం చేశారు.
ఆమె మోకాళ్ల వరకు ఫ్రాక్ వేసుకుందని, అంత అసభ్యంగా ఏమి లేదని, అదే విమానంలోని పురుష సిబ్బందికి అంత అభ్యంతరకరంగా ఎందుకు కనిపించిందో అర్థం కాలేదని అన్నారు. అదే సంస్థలో పని చేస్తున్న ఎయిర్ హోస్టులు మాత్రం మోకాళ్ల వరకు ఫ్రాక్ లు వేసుకున్నారని గుర్తు చేశారు.
ఈ విషయంపై పురభి దాస్ ఇండిగో సంస్థ కస్టమర్ కేర్ ను సంప్రదించారు. ఫ్రాక్ లు వేసుకుంటే తమ విమానాలలో ప్రయాణించడానికి తాము అనుమతి ఇవ్వమని వారు చెప్పారని పురభి దాస్ వివరించారు. చివరికి ఆమె విమానం మిస్ అయ్యింది.
దుస్తులు మార్చుకున్న తరువాత ఆమె వేరే విమానంలో ఢిల్లీ చేరుకున్నారని పురభి దాస్ వివరించారు. విమానం నుంచి కిందకు దించేసిన ఆ మహిళా ప్రయాణికురాలు అదే ఇండిగో సంస్థలో పని చేస్తున్న ఉద్యోగి సోదరి అని పురభి దాస్ వివరించారు.