ఫేస్బుక్ను వెనక్కి నెట్టిన ట్రూ కాలర్: అత్యధిక డౌన్ లోడ్స్ జాబితాలో టాప్-4..
అత్యధిక డౌన్ లోడ్స్ జాబితాలో వాట్సాప్ తొలి స్థానంలో ఉండగా.. మెసేంజర్, షేరిట్ ఆ తర్వాతి స్థానాల్లో ఉన్నాయి. యాడ్ మార్కెటింగ్ కు కూడా ట్రూ కాలర్ ఎంతగానో తోడ్పడుతోందని మేరీ మీకర్ వెల్లడించింది.
న్యూఢిల్లీ: 'ట్రూ కాలర్'.. స్మార్ట్ ఫోన్ వినియోగిస్తున్న చాలామంది యూజర్స్ ఇప్పుడు ఈ యాప్ను తప్పనిసరిగా వాడుతున్నారు. గుర్తు తెలియని నంబర్స్ నుంచి ఫోన్ కాల్ వచ్చినప్పుడు.. మొబైల్ స్క్రీన్పై పేరు కనిపించేలా ఈ యాప్ ఉపకరిస్తుంది. ఇటీవల ట్రూ కాలర్ యాప్ వినియోగం మరింత పెరిగిపోయి.. ఏకంగా ఫేస్ బుక్ను అధిగమించేయడం గమనార్హం.
మేరీ మీకర్ ఇంటర్నెట్ ట్రెండ్స్-2017 వెల్లడించిన వివరాల్లో ఈ విషయం స్పష్టమైంది. భారత్ లో అత్యధిక డౌన్ లోడ్ లు పొందిన యాప్ ల జాబితాలో ఫేస్ బుక్ ను వెనక్కి నెట్టి ట్రూ కాలర్ నాలుగో స్థానంలో నిలిచింది. గూగుల్ ప్లే స్టోర్ ద్వారా ఈ అత్యధిక డౌన్ లోడ్స్ జరిగినట్లు మేరీ మీకర్ తెలిపింది.
కాగా, అత్యధిక డౌన్ లోడ్స్ జాబితాలో వాట్సాప్ తొలి స్థానంలో ఉండగా.. మెసేంజర్, షేరిట్ ఆ తర్వాతి స్థానాల్లో ఉన్నాయి. యాడ్ మార్కెటింగ్ కు కూడా ట్రూ కాలర్ ఎంతగానో తోడ్పడుతోందని మేరీ మీకర్ వెల్లడించింది. సగటున రోజుకు లక్ష వరకు క్లిక్స్ను ట్రూ కాలర్ ఆయా యాడ్స్కు అందిస్తున్నట్లు పేర్కొంది.