మరో చిక్కు: మహిళా ప్యాసెంజర్ను బలవంతంగా ముద్దు పెట్టబోయిన ఉబేర్ డ్రైవర్
న్యూఢిల్లీ: మహిళా ప్రయాణికుల భద్రత విషయంలో ఉబేర్ సంస్థ మరోసారి చిక్కుల్లో పడింది. మహిళా ప్రయాణికుల భద్రతకు ఆ సంస్థ తీసుకుంటున్న చర్యలు మరోసారి ప్రశ్నార్థకంగా మారాయి. ఉబేర్ డ్రైవర్ ఒకతను మహిళా ప్రయాణికురాలిని బలవంతంగా ముద్దు పెట్టుకోవడానికి ప్రయత్నించాడు.
నిరుడు డిసెంబర్లో ఓ మహిళపై ఉబేర్ క్యాబ్ డ్రైవర్ అత్యాచారానికి పాల్పడిన తర్వాత ఢిల్లీ ప్రభుత్వం ఆప్ బేస్డ్ టాక్సీ సర్వీసులను రద్దు చేసింది. అయినా ఆ క్యాబ్స్ ఢిల్లీ రోడ్లపై తిరుగుతూనే ఉన్నాయి. ఈ తాజా సంఘటన నెల రోజుల క్రితం జరిగింది. బాధితురాలి సోదరుడు మే 30వ తేదీన ఫేస్బుక్లో కామెంట్ పెట్టడంతో ఆ సంఘటన వెలుగు చూసింది.
గుర్గావ్ నుంచి రావడానికి తమ సోదరి ఉబేర్ క్యాబ్ను బుక్ చేసుకుందని, డ్రైవర్ వినోద్ తన సోదరిని బలవంతంగా ముద్దు పెట్టుకోవడానికి ప్రయత్నించాడని, ఉబేర్ కంపెనీకి ఈ విషయంపై ఫిర్యాదు చేశామని, అయినా ఇప్పటి వరకు ఏ విధమైన సమాధానం రాలేదని ఆయన అన్నారు.
ఆ డ్రైవర్ను తాము విచారించామని, అటువంటి సంఘటనలను తాము సహించబోమని దానికి ఉబేర్ కంపెనీ సమాధానం ఇచ్చింది. ఉబేర్ క్యాబ్ డ్రైవర్ శివ కుమార్ యాదవ్ 25 ఏళ్ల మహిళపై అత్యాచారం చేసిన సంఘటన తర్వాత ఈ సంఘటన జరిగింది.