ప్రముఖ తమిళ హీరోకు డీఎంకే పార్టీ యూత్ విభాగం పగ్గాలు, తాత, తండ్రి అడుగుజాడల్లో !
చెన్నై: డీఎంకే పార్టీ యువజన విభాగం (యూత్ వింగ్) ప్రధాన కార్యదర్శిగా ప్రముఖ తమిళ హీరో, నిర్మాత ఉదయానిధి స్టాలిన్ ను నియమించామని ఆ పార్టీ ప్రధాన కార్యదర్శి కే. అన్బళగన్ తెలిపారు. తమిళనాడు మాజీ దివంగత ముఖ్యమంత్రి ఎం. కరుణానిధి మనుమడు, ఆ రాష్ట్ర శాసన సభలో ప్రధాన ప్రతిపక్ష నాయకుడైన ఎంకే. స్టాలిన్ కుమారుడు అయిన ఉదయానిధి స్టాలిన్ ఇక ప్రత్యక్ష రాజకీయాల్లో చురుకుగా పాల్గొనడానికి రంగం సిద్దం అయ్యింది.
ఎంకే. స్టాలిన్ డీఎంకే పార్టీ యువజన విభాగం ప్రధాన కార్యదర్శిగా 30 ఏళ్లు పని చేశారు. డీఎంకే పార్టీ పగ్గాలు చేపట్టిన ఎంకే. స్టాలిన్ యూత్ విభాగం ప్రధాన కార్యదర్శి పదవికి రాజీనామా చేశారు. తరువాత మాజీ శాసన సభ్యుడు వెల్లకోవిల్ ఎంపీ స్వామినాథన్ కు డీఎంకే పార్టీ యూత్ విభాగం పగ్గాలు అప్పగించారు.
ఎంకే. స్టాలిన్ నుంచి యూత్ విభాగం భాద్యతలు స్వీకరించిన ఎంపీ. స్వామినాథన్ తనదైన మార్క్ లో ఇంత కాలం పార్టీ కార్యకలాపాలు కొనసాగించారు. అయితే ఇటీవల జరిగిన డీఎంకే పార్టీ నాయకుల సమావేశంలో ఆ పార్టీ యూత్ విభాగం పగ్గాలు ఉదయానిధి స్టాలిన్ కు అప్పగించాలని నిర్ణయించారు.
మూడు సంవత్సరాల క్రితం ఉదయానిధి స్టాలిన్ ప్రత్యక్ష రాజకీయాల్లోకి అడుగుపెట్ట్టారు. తాత ఎం. కరుణానిధి, తండ్రి ఎంకే. స్టాలిన్ ను ఆదర్శంగా తీసుకున్న ఉదయానిధి స్టాలిన్ పార్టీ కార్యక్రమాల్లో పాల్గొంటున్నారు. అనేక తమిళ సినిమాల్లో హీరోగా నటించిన ఉదయానిధి స్టాలిన్ మురసోలి ట్రస్ట్ మేనేజింగ్ డైరెక్టర్ గా కొనసాగుతున్నారు.