గాడిదకు జాతీయ హోదా, గేదలు, లవర్స్ కు ప్యాకేజీలు: ఎన్నికల మేనిఫెస్టోలో హామీలు !
బెంగళూరు: కన్నడ పోరాట నాయకుడు, వాటల్ పార్టీ వ్యవస్థాపకుడు, మాజీ ఎమ్మెల్యే వాటల్ నాగరాజు ఏమి చేసినా విచిత్రంగానే ఉంటుంది. ఆయన ఆందోళనలు చేసినా, కావేరీ నీటికోసం పోరాటం చేసినా, ధరలు పెరుగుదలను వ్యతిరేకించినా, ఇతర బాష సినిమాలు విడుదల కాకూడదు అని డిమాండ్ చేసినా గేదలు, గాడిదలను వెంట తీసుకెళ్లి చిత్రవిచిత్రంగానే నిరసనలు వ్యక్తం చేస్తారు. వాటల్ నాగరాజ్ వాటల్ పార్టీ మేనిఫెస్టోను విడుదల చేసి అందర్నీ షాక్ కు గురి చేశారు.
ఎన్నికల్లో పోటీ
కర్ణాటక శాసన సభ ఎన్నికల్లో వాటల్ నాగరాజ్ పోటీ చేస్తున్నారు. చామరాజనగర నియోజక వర్గం నుంచి వాటల్ నాగరాజ్ బరిలో ఉన్నారు. కర్ణాటక ఎన్నికల సందర్బంగా ఇప్పటికే పార్టీ ఎన్నికల మేనిఫెస్టోని విడుదల చేసి హామీలు గుప్పించారు.
వాటల్ పార్టీ మేనిఫెస్టో
బుధవారం వాటల్ నాగరాజ్ ఆయన పార్టీ ఎన్నికల మేనిఫెస్టోను విడుదల చేశారు. అన్ని పార్టీల లాగే వాటల్ నాగరాజ్ తన ఎన్నికల మేనిఫెస్టోలో పలు హామీలు ఇచ్చారు. వాటల్ నాగరాజ్ మేనిఫెస్టో చూసిన ప్రజలకు ఒక్కసారిగా దిమ్మతిరిగింది.
గాడిదకు జాతీయ హోదా
తాము అధికారంలోకి వస్తే గాడిదకు జాతీయ హోదా ప్రకటిస్తామని వాటల్ నాగరాజ్ స్పష్టం చేశారు. అంతే కాకుండా గాడుదల అభివృద్ది కోసం ప్రత్యేక బోర్డు ఏర్పాటు చేసి బడ్జెట్ లో నిధులు కేటాయిస్తామని వాటల్ నాగరాజ్ ప్రకటించారు.
ప్రేమికులకు ప్యాకేజీలు
ప్రేమికుల రోజు వారికి మద్దతు ప్రకటించడం వాటల్ నాగరాజ్ కు అనవాయితి. ఇప్పుడు ప్రేమికులకు ప్రత్యేక ప్యాకేజీలు ప్రకటించారు. ప్రేమికుల రోజు ప్రభుత్వ సెలవుగా ప్రకటిస్తామని, ప్రేమ వివాహాలు చేసుకునే వారికి రూ. 50 వేలు ప్రోత్సాహక నగదు ఇస్తామని వాటల్ నాటరాజ్ తన ఎన్నికల మేనిఫెస్టోలో ప్రకటించారు.
గేదల అభివృద్ది పథకం
గేదలు (ఎనుములు) అభివృద్ది కోసం ప్రత్యేక పథకాలు అమలు చేస్తామని వాటల్ నాగరాజ్ హామీ ఇచ్చారు. ఢిల్లీలోని ఎర్రకోట మీద కన్నడ జెండా ఎగరవేస్తామని వాటల్ నాగరాజ్ అన్నారు. హెల్మెట్లు తప్పనిసరిగా వేసుకోవాలని ప్రభుత్వం పెట్టిన నియమాలు ఎత్తివేస్తాని చెప్పారు. ఇలా చిత్రవిచిత్ర పథకాలతో వాటల్ నాగరాజ్ ఎన్నికల మేనిఫెస్టో విడుదల చేసి అందర్నీ ఆశ్చర్యానికి గురి చేశారు.