గుజరాత్ కొత్త సీఎంగా 'విజయ్ రూపానీ'
గాంధీనగర్ : అనూహ్య పరిణామాల మధ్య ఖాళీ అయిన గుజరాత్ సీఎం పీఠం ఎవరిని వరిస్తుందనే దానిపై ఉత్కంఠ నెలకొన్న విషయం తెలిసిందే. రేసులో చాలా పేర్లు వినిపిస్తున్నా.. ప్రస్తుతం మంత్రిగా కొనసాగుతోన్న విజయ్ రూపాని పేరు కొత్త సీఎంగా ఖరారైంది. అలాగే డిప్యూటీ సీఎంగా మరో మంత్రి నితిన్ భాయ్ పటేల్ ను కేంద్ర వర్గాలు ఖరారు చేశాయి.
కేంద్ర అధికార వర్గాలకు, రాష్ట్ర ఎమ్మెల్యేలకు మధ్య కీలక భేటీ జరగబోతున్న నేపథ్యంలో.. సీఎం, డిప్యూటీ సీఎంలు గా విజయ్ రూపానీ, నితిన్ భాయ్ పటేల్ పేర్లు ఖరారు కావడం గమనార్హం. ఇకపోతే ఆనందీబెన్ కేబినెట్ లో పనిచేసిన మంత్రుల్లో విజయ్ రూపానీ ఒక్కరే ఎమర్జెన్సీ సమయంలో జైలు జీవితం గడిపిన నేత కావడం విశేషం.
61 ఏళ్ల విజయ్ రూపానీ ఏబీవీపీ నేతగా, ఆర్ఎస్ఎస్ ప్రతినిధిగా తన రాజకీయ ప్రస్థానాన్ని ప్రారంభించారు. అనంతర కాలంలో రాజ్ కోట్ కార్పోరేటర్ గా, మేయర్ గా.. రాజ్యసభ ప్రతినిధిగా పలు పదవీ బాధ్యతలు చేపట్టారు.