పెళ్లి ఊరేగింపులో నృత్యం చేస్తూ.. గుండెపోటుతో కన్నుమూసిన వరుడు
పెళ్లి ఊరేగింపులో నృత్యం చేస్తున్న పెళ్లికొడుకు హటాత్తుగా గుండెపోటుకు గురై ఒక్కసారిగా కుప్పకూలిపోయిన ఘటన గుజరాత్లోని బోర్సాడ్ పట్టణంలో చోటుచేసుకుంది.
గుజరాత్: ఆనందంగా సాగుతున్న వివాహ వేడుకలో ఒక్కసారిగా విషాదం చోటుచేసుకుంది. ఊరేగింపులో నృత్యం చేస్తున్న పెళ్లికొడుకు(25) గుండెపోటుకు గురై ఒక్కసారిగా కుప్పకూలిపోయాడు.
గుజరాత్ వడోదర లోని బోర్సాడ్ పట్టణంలో ఈ ఘటన చోటుచేసుకుంది. పెళ్లి కుమారుడు సాగర్ సోలంకీ మంగళవారం రాత్రి కుటుంబ సభ్యులు, స్నేహితులతో కలిసి పెళ్లి ఊరేగింపులో పాల్గొన్నాడు.
తన స్నేహితుడి భుజాలపై కూర్చుని చేతులెత్తి ఉత్సాహంగా డ్యాన్స్ చేస్తూ వూరేగుతున్నాడు. ఇంతలో ఒక్కసారి గుండెపోటుకు గురై స్నేహితుడి భుజంపైనే కుప్పకూలిపోయాడు. ఊరేగింపులో ఉన్న వారికి ఏం జరిగిందో వెంటనే అర్థం కాలేదు.
జరిగింది అర్థమవగానే వారు వెంటనే పెళ్లికొడుకును స్థానిక ఆసుపత్రికి తరలించారు. కానీ అప్పటికే అతడు చనిపోయినట్లు అక్కడి వైద్యులు నిర్ధారించారని సాగర్ తండ్రి రాజేశ్ తెలిపారు. ఈ ఘటన ఇరు కుటుంబాల్లో విషాదాన్ని మిగిల్చింది.