యువతిని, బాయ్ఫ్రెండ్ని చావబాదిన పోలీస్లు
ముంబై: మహారాష్ట్ర రాజధాని ముంబైలోని అంధేరీ పోలీసు స్టేషన్లో ఓ యువతి, ఆమె బాయ్ ఫ్రెండ్ను పోలీసులు వేధించిన ఓ వీడియో ఇంటర్నెట్లో హల్ చల్ చేస్తోంది. నవంబర్ 1వ తేదీన ఆ జంటను పోలీసులు వేధించారు.
వారిద్దరు కూడా బాగా తాగి నడి రోడ్డు పైన గొడవకు దిగారని పోలీసులు చెబుతున్నారు. దీంతో వారిని పోలీసు స్టేషన్కు తీసుకు వచ్చారు. పోలీస్ స్టేషన్కు తీసుకు వచ్చిన ఆ యువతిని, బాయ్ ఫ్రెండ్ను నలుగురైదుగురు పోలీసులు వేధించిన వీడియో సంచలనం రేపుతోంది.
పోలీసులు ఆ యువతిని రక్తం వచ్చేదాకా కొట్టారని తెలుస్తోంది. ఓ మహిళా పోలీస్ అధికారి యువతి పైన దారుణంగా చేయి చేసుకుందని సమాచారం. యువకుడ్ని కూడా కొట్టారు. వారు కొడుతుండగా యువతి, బాయ్ ఫ్రెండ్ కేకలు పెట్టారు.
రోడ్డు పైన ఆ యువతి, యువకుడు తాగి పోలీసు స్టేషన్ ఎదుటనే దెబ్బలాడుకుంటున్న సమయంలో, ఓ కానిస్టేబుల్ ఆ అమ్మాయిని ఉద్దేశించి... అతను ఏమైనా వేధిస్తున్నాడా అని అడిగాడు.
దానికి ఆమె, తమ వ్యక్తిగత విషయమని, ఎవరి మధ్యవర్తిత్వం అవసరం లేదని చెప్పిందని తెలుస్తోంది. దీంతో యువతిని, బాయ్ ఫ్రెండ్ను స్టేషన్లోకి తీసుకు వెళ్లి వేధించారని సమాచారం. బాధితులు ఇద్దరు కూడా ఓ కాల్ సెంటర్లో పని చేస్తున్నట్లుగా తెలుస్తోంది.