మరో సంచలనం: కాంగ్రెస్ ఎమ్మెల్యేతో యడ్యూరప్ప బేరసారాల ఆడియో లీక్!
బెంగళూరు: కాంగ్రెస్ పార్టీ మరో బాంబు పేల్చింది. ఇప్పటిదాకా గాలి జనార్దన్ రెడ్డి, యడ్యూరప్ప కొడుకుల బేరసారాల ఆడియో టేపులు బయటపెట్టిన ఆ పార్టీ.. ఇప్పుడు ఏకంగా సీఎం యడ్యూరప్ప ఆడియో టేపును బయటపెట్టింది. ఆడియో టేపులో యడ్యూరప్ప బేరసారాలు స్పష్టంగా రికార్డయ్యాయి. కాంగ్రెస్ ఎమ్మెల్యే బీసీ పాటిల్ కు మంత్రి పదవితో పాటు ఏ సహాయం కావాలన్నా చేసి పెడుతామని యడ్యూరప్ప అందులో పేర్కొనడం గమనార్హం.
ఆడియో టేపు సంభాషణ యథావిధిగా:
బీసీ పాటిల్: హలో.. హలో.. హలో.. ఫోన్ ఆయనకు ఇవ్వండి(ఫోన్ చేసిన వ్యక్తితో)
యడ్యూరప్ప: హలో
బీసీ పాటిల్: అన్నా నమస్కార, అభినందనలు..
యడ్యూరప్ప: ఎక్కడున్నావ్?
బీసీ పాటిల్: బస్సులో కొచ్చికి వెళ్తున్నాం..
యడ్యూరప్ప: వద్దు.. కొచ్చికి వెళ్లవద్దు. వెనక్కి వచ్చేసేయ్. మేము నిన్ను మంత్రిని చేస్తాం. నీకే సహాయం కావాలన్నా చేసి పెడుతాం.
బీసీ పాటిల్: ఓకె అన్నా.. మీరిప్పుడు చెప్పారు..
యడ్యూరప్ప: సరైన సమయంలోనే నేనేదైనా చేస్తా. అందుకే ఇప్పుడు ఫోన్ కాల్ చేశా. కాబట్టి ఇప్పుడు కొచ్చికి వెళ్లవద్దు. వెనక్కి వచ్చేసెయ్.
బీసీ పాటిల్: కానీ మేము బస్సులో ఉన్నాం..
యడ్యూరప్ప: వద్దు, వెళ్లవద్దు, ఏదో ఒకటి చెప్పి వచ్చెయ్
బీసీ పాటిల్: అయితే నా స్థానమేంటో చెప్పండి
యడ్యూరప్ప: నువ్వు మంత్రివి అవుతావు..
బీసీ పాటిల్: అన్నా.. నాతో పాటు మరో ముగ్గురు ఉన్నారు
యడ్యూరప్ప: వాళ్లను కూడా తీసుకొచ్చెయ్, నాపై నీకు నమ్మకం లేదా?
యడ్యూరప్ప: ఇక వచ్చేయండి, బస్సులో వెళ్లకండి..
బీసీ పాటిల్: ఓకె అన్నా ఓకె..
యడ్యూరప్ప: మీరు గనుక ఒక్కసారి కొచ్చికి వెళ్లారంటే.. ఇక పని అయిపోయినట్టే. మళ్లీ మీరు మాకు చిక్కరు.
బీసీ పాటిల్: ఓకె ఓకె అన్నా..