బార్ లో బర్త్ డే పార్టీ: 13 మంది సజీవదహనం
ప్యారిస్: పుట్టిన రోజు వేడుకల్లో జరిగిన అగ్ని ప్రమాదంలో 13 మంది మరణించారు. సంతోషంగా గడుపుతున్న వారు ఒక్క సారిగా మంటల్లో చిక్కుకుని సజీవదహనం అయ్యారు. ప్యారిస్ లోని రోవన్ నగరంలో ఈ దుర్ఘటన జరిగింది.
ఉత్తర ప్యారిస్ లోని రోవన్ నగరంలోని ఓ బార్ లో యువకుడి బర్త్ డే పార్టీ ఏర్పాటు చేశారు. ఆ యువకుడి స్నేహితులు అందరూ పార్టీకి హాజరైనారు. అర్దరాత్రి సమయంలో బార్ లో బర్త్ డే పార్టీ జోరుగా జరుగుతున్నది.
ఆ సందర్బంలో బార్ లో ఒక్క సారిగా మంటలు చెలరేగాయి. బర్త్ డే పార్టీలో ఉన్న వారు బయటకు పోలేక అక్కడే సజీవదహనం అయ్యారని స్థానిక మీడియా వెల్లడించింది. అగ్నిమాపక సిబ్బంది సంఘటనా స్థలానికి చేరుకుని మంటలు అదుపు చేశారు.
అనేక మందికి గాయాలై వివిధ ఆసుపత్రుల్లో చికిత్స పొందుతున్నారు. మరణించిన వారిలో ఎక్కువ మంది యువకులే ఉన్నారని పోలీసు అధికారులు చెప్పారు. ఈ ప్రమాదం వెనుక ఎలాంటి ఉగ్రవాదుల హస్తం లేదని, ప్రమాదవశాత్తు మంటలు చెలరేగాయని స్థానిక మీడియా తెలిపింది. కేసు దర్యాప్తులో ఉంది.