భారీ పేలుడు: 29 మంది మృతి, 70మందికి గాయాలు
మెక్సికోలో జరిగిన భారీ పేలుడు సంభవించింది. ఈ పేలుడు ఘటనలో 26 మంది మృతిచెందగా.. మరో 70 మందికి పైగా గాయపడ్డారు.
మెక్సికో: మెక్సికోలో జరిగిన భారీ పేలుడు సంభవించింది. ఈ పేలుడు ఘటనలో 29 మంది మృతిచెందగా.. మరో 70 మందికి పైగా గాయపడ్డారు. రాజధాని నగరమైన మెక్సికో సిటీలోని బాణాసంచా మార్కెట్లో మంగళవారం రాత్రి ఈ పేలుడు సంభవించింది.
క్షతగాత్రులను సమీపంలోని పలు ఆస్పత్రులకు తరలించి చికిత్స అందిస్తున్నారు. క్రిస్మస్, న్యూఇయర్ వేడుకల నేపథ్యంలో బాణాసంచా కొనుగోలు చేసేందుకు భారీ సంఖ్యలో ప్రజలు తరలిరావడంతో మార్కెట్ కిటకిటలాడుతోంది. ఆ సమయంలో ఒక్కసారిగా పేలుడు సంభవించి బాణాసంచా దుకాణాలు దగ్ధమయ్యాయి.
పేలుడు ధాటికి సమీపంలోని ఇళ్లు, వాహనాలు కూడా ధ్వంసమయ్యాయి. ఈ ఘటనలో మార్కెట్ మొత్తం దగ్ధమైంది. మూడు గంటలపాటు శ్రమించిన తర్వాత మంటలు అదుపులోకి వచ్చినట్లు ఫైర్ సిబ్బంది వెల్లడించారు.
కాగా, ఈ పేలుడు ఘటనపై మెక్సికో అధ్యక్షుడు ఎన్రిక్ పెనా నియోటో తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు.