విషాదం: 8నెలల గర్భిణి తల్లిని కాల్చిన మూడేళ్ల బాలుడు
హూస్టన్: తుపాకీతో ఆడుకుంటూ మూడేళ్ల బాలుడు పొరపాటున తల్లిదండ్రులను కాల్చిన ఘటన న్యూ మెక్సికోలోని అలబుక్విరిక్విలోని హోటల్ రూమ్లో శనివారం జరిగింది. వివరాల్లోకి వెళితే... ఈ ఘటనలో బాలుడి తండ్రితో పాటు గర్భిణి అయిన తల్లికి తీవ్రగాయాలయ్యాయి.
బాలుడు ఆటాడుకుంటూ తన తల్లి పర్సులో నుంచి హ్యాండ్ గన్ను తీసుకుని కాల్చగా బుల్లెట్ మొదట తండ్రి శరీరం పక్కభాగంలో దూసుకెల్లి బయటకు వచ్చి తల్లిని తాకింది. దీంతో హుటాహుటిన సమీపంలోని ఆసుపత్రికి బాలుడి తల్లి దండ్రులను తరలించారు.
తండ్రి ఆసుపత్రి నుంచి డిశ్చార్జి కాగా ఎనిమిది నెలల గర్భంతో ఉన్న తల్లి పరిస్ధితి ఇంకా విషమంగానే ఉంది. బాలుడికి 2 సంవత్సరాల వయసున్న చెల్లెలు కూడా అదే హోటల్ రూంలో ఉండటంతో వారిద్దరిని చిన్నపిల్లల సంరక్షణ అధికారులు అదుపులోకి తీసుకున్నారు.
తల్లిదండ్రులపై బాధ్యతా రాహిత్యం కింద కేసు నమోదు చేసే అవకాశం ఉందని అలబుక్విరిక్వి జిల్లా పోలీసు అధికారి తెలిపారు. గతంలో కూడా అమెరికాలో చిన్న పిల్లలు కాల్చుకున్న ఘటనలు చాలా జరిగాయి.
జనవరి 21న ఫ్లోరిడాలో 2 సంవత్సరాల బాలుడు కారులో ఉన్న తండ్రి పిస్టల్తో కాల్చుకొని చనిపోయాడు. జనవరి మొదటి వారంలో డెట్రాయిట్లో 4 సంవత్సరాల బాలిక తన తోటి కుటుంబ సభ్యుడుని గన్తో కాల్చిన విషయం తెలిసిందే.