అమెరికాలో మరో ఉపద్రవం: కరోనా.. జాత్యహంకార అల్లర్లకు తోడుగా: కంపించిన కాలిఫోర్నియా
వాషింగ్టన్: ఒకవైపు కరోనా వైరస్.. మరోవైపు జాత్యహంకార దాడులతో ఉక్కిరిబిక్కిరికి గురి అవుతోంది అగ్రరాజ్యం అమెరికా. లక్షలాది మంది అమెరికన్లు ఇప్పటికే కరోనా వైరస్ బారిన పడ్డారు. లక్ష మందికి పైగా మృత్యువాత పడ్డారు. అదే సమయంలో ఆఫ్రికన్ అమెరికన్ జార్జ్ ఫ్లాయిడ్ హత్యోదంతం తెర మీదికి రావడంతో జాత్యహంకార దాడులు ఆరంభం అయ్యాయి. అమెరికా అంతటా దావానలంలో వ్యాపించాయి. ఈ రెండు ఉదంతాలను ఎదర్కొంటోన్న అమెరికా మరో ఉపద్రవం ముంచుకొచ్చింది.. భూకంపం రూపంలో.
Recommended Video
కాలిఫోర్నియాలో భారీ భూకంపం సంభవించింది. అమెరికా కాలమానం ప్రకారం.. బుధవారం రాత్రి కాలిఫోర్నియా దక్షిణ ప్రాంతంలో భూకంపం సంభవించినట్లు అమెరికా అమెరికా జియాలాజికల్ సర్వే విభాగం వెల్లడించింది. దీని తీవ్రత రిక్టర్ స్కేలుపై 5.5గా నమోదైంది. లాస్ ఏంజెలిస్కు ఈశాన్య దిక్కున 189 కిలోమీటర్ల దూరంలో భూమి కంపించినట్లు జియాలాజికల్ సర్వే అధికారులు నిర్ధారించారు. సియర్స్లెస్ వ్యాలీ ప్రాంతంలోని రిడ్జ్క్రెస్ట్, శాన్ బెర్నార్డినో నగరాలపై ఈ భూకంపం ప్రభావం పడినట్లు తెలిపారు. సియర్స్లెస్ వ్యాలీని భూకంప కేంద్రంగా గుర్తించారు.
EARTHQUAKE DETAILS: 6:32 P.M. 5.5 magnitude 14 miles east of Ridgecrest. pic.twitter.com/TDVq3NJWAN
— Tedd Florendo (@TeddFlorendo) June 4, 2020
భూ ఉపరితలం నుంచి 6.9 కిలోమీటర్ల లోతున పెను భూకంపం సంభవించినట్లు గుర్తించారు. దాని ప్రభావం వల్ల రిడ్జ్క్రెస్ట్ నగరం సమీపంలో భూమి ప్రకంపించిందని పేర్కొన్నారు. రిడ్జ్క్రెస్ట్ నగరంలో భవనాలు కంపించాయని, వాటి కిటికీ అద్దాలు పగిలిపోవడం వంటి సంఘటనలు చోటు చేసుకున్నట్లు సమాచారం. దీనివల్ల ఏదైనా ప్రాణ, ఆస్తి నష్టాలు సంభవించాయా? లేదా? అనేది ఇంకా తెలియరాలేదు. దీనిపై అధికారులు ఆరా తీస్తున్నారు. 29 వేల జనాభా గల రిడ్జ్క్రెస్ట్ సిటీ మొజావె ఎడారికి ఆనుకుని ఉంటుంది.
I felt that shaking from Culver City!#CAearthquake #earthquake #Ridgecrest #SearlesValley pic.twitter.com/66iPsfeC5q
— Leah Freeman (@leahmfreeman) June 4, 2020
10 రోజుల వ్యవధిలో ఇదే ప్రాంతంలో అయిదుసార్లు భూమి కంపించిందని జియాలాజికల్ సర్వే అధికారులు వెల్లడించారు. మూడు కంటే తక్కువ తీవ్రత గల భూప్రకంపనలు కావడం వల్ల వాటి ప్రభావం పెద్దగా పడలేదని అన్నారు. అదే సమయంలో 5.5 తీవ్రతతో భారీ భూకంపం సంభవించడం వల్ల ఆందోళన వ్యక్తమౌతోంది. మున్ముందు దీని తీవ్రత మరింత పెరిగే ప్రమాదం ఉండొచ్చనే భయాందోళను స్థానికుల్లో వ్యక్తమౌతున్నాయి. కాలిఫోర్నియా ప్రభుత్వం.. ప్రజలు అప్రమత్తంగా ఉండాలంటూ హెచ్చరికలను జారీ చేసింది. రెస్క్యూ విభాగాన్ని సిద్ధం చేసింది.