హమ్మయ్యా.. ఆస్పత్రి నుంచి హలీవుడ్ నటుడు టామ్‌హంక్స్ డిశ్చార్జ్, ఆస్పత్రిలోనే అతని భార్య రీటా...

గత కొద్దిరోజులుగా ప్రపంచాన్ని వణికిస్తోన్న కరోనా వైరస్ హాలీవుడ్ దంపతులు టామ్ హంక్స్, రీటా విల్సన్‌కు కూడా సోకిన సంగతి తెలిసిందే. దీంతో వారు షూటింగ్‌లో భాగంగా ఉన్న ఆస్ట్రేలియాలోని ఆస్పత్రిలో చికిత్స తీసుకున్నారు. అయితే టామ్ హంక్స్‌కు పరిస్థితి మెరగవడంతో అతనిని వైద్యులు డిశ్చార్జ్ చేశారు. కానీ అతని భార్య రీటా విల్సన్ మాత్రం ఇంకా ఆస్పత్రిలోనే ఉన్నారని వైద్యులు తెలిపారు. ఆమె పరిస్థితి మెరుగుపడిన తర్వాతే రిలీజ్ చేస్తామని స్పష్టంచేశారు.

షూటింగ్‌లో వైరస్..

ప్రతిష్టాత్మకమైన ఆస్కార్ అవార్డును పలుమార్లు గెలుచుకున్న టామ్ హంక్స్ షూటింగ్‌లో భాగంగా ఆస్ట్రేలియా వచ్చారు. ఎల్వీస్ ప్రెస్లీ బయోపిక్‌లో నటించేందుకు బ్రిస్బేన్‌ సమీపంలో గల గోల్డ్ కోస్ట్‌కు సతీసమేతంగా వచ్చారు. అయితే బయోపిక్ డైరెక్ట్ చేస్తున్న విల్సన్ సహా టామ్ హంక్స్ దంపతులు వైరస్ బారిన పడ్డారు. దీంతో కలకలం రేగింది. వెంటనే వారిని సమీప ఆస్పత్రిలో క్యారంటైన్‌లో ఉంచారు. టామ్ హంక్స్‌కు వైరస్ తగ్గడంతో అతనిని వైద్యులు ఇంటికి పంపించారు.

కచేరీలు కూడా..

నేపథ్య గాయకుడు, గేయ రచయిత అయిన విల్సన్ సిడ్నీ, బ్రిస్బేన్‌లో కచేరీలు కూడా నిర్వహించారు. ఆ తర్వాతే అతనికి కరోనా పాజిటివ్ వచ్చింది. దీంతో ఆ సమయంలో అతను ఎవరితో కలిశారు, క్లోజ్‌గా ఎవరితో ఉన్నారనే అంశంపై అధికారులు దృష్టిసారించారు. ఎవరైనా కరోనా వైరస్ బారినపడ్డారా అనే అంశంపై ఆరాతీస్తున్నారు. ఆస్ట్రేలియాలో ఇప్పటివరకు 400 పాజిటివ్ కేసులు నమోదు కాగా.. ఐదుగురు చనిపోయారు. వైరస్ రోజురోజుకు వ్యాప్తిచెందడంతో ఆందోళన నెలకొంది.

డాక్టర్లకు థాంక్స్..

టామ్ హంక్స్ దంపతులకు కరోనా పాజిటివ్ వచ్చిందనే అంశంపై సోషల్ మీడియాలో విస‌ృత ప్రచారం జరిగింది. తమకు సకాలంలో వైద్యం అందించిన వైద్యులకు టామ్‌హంక్స్ దంపతులు ధన్యవాదాలు తెలిపారు. ఆస్పత్రి నుంచి డిశ్చార్జ్ అయ్యాక టామ్ హంక్స్.. గోల్డ్ కోస్ట్‌లో గల తన అపార్ట్‌మెంట్‌కు వెళ్లారు. అతని భార్య రీటా మాత్రం ఆస్పత్రిలోనే ఉన్నారు. వైరస్ తగ్గాక.. అతనితో కలుస్తారని టామ్ హంక్స్ మేనేజర్ ఒకరు మీడియాకు తెలియజేశారు.

English summary

Tom Hanks has been released from the Australian hospital where he was in isolation since testing positive for the coronavirus last week.